Traballos pendentes de presentar

Resumo
Este traballo ten como obxectivo analizar en profundidade a liberdade de establecemento como principio fundamental do ordenamento xurídico da Unión Europea, con especial atención á súa aplicación no ámbito do dereito societario e aos problemas que xurdiron neste sentido trala saída do Reino Unido da Unión, coñecida como Brexit. A análise estrutúrase en cinco bloques, que buscan abordar tanto a base teórica e xurídica do concepto como os retos e solucións que se presentan neste novo escenario. En primeiro lugar, trataremos a liberdade de establecemento como alicerce central do noso estudo e do Mercado Único, así como a súa codificación no ordenamento xurídico da Unión. Centrarémonos no significado deste concepto e na súa aplicación práctica, así como no papel do Tribunal de Xustiza da Unión Europea na configuración da súa definición. Así mesmo, examinaremos o contido práctico deste dereito a través de numerosos casos presentados ante o Tribunal, o que abrangue o seu exercicio e os intentos de codificación a nivel continental. A continuación, abordaremos o contexto histórico do Mercado Único, esencial para comprender as catro liberdades fundamentais, centrando a atención no seu funcionamento básico e nos principios que o sustentan. Proseguiremos coa análise da relación histórico-xurídica entre o Reino Unido e a UE, e como esta influíu na realidade xurídica actual de ambas as partes. Destacaremos o papel do Reino Unido na construción xurídica europea, e como o seu sistema legal, diferente e máis flexible que o do resto do continente, lle proporcionou unha posición particular en termos de desenvolvemento xurídico, atracción de investimentos e constitución de sociedades. Falaremos do xurdimento do movemento Brexit, os seus obxectivos iniciais e as consecuencias finais para o Mercado Único, así como do Acordo de Comercio e Cooperación que se alcanzou finalmente. Posteriormente, analizaremos os problemas derivados desta situación, o seu impacto tanto para as sociedades como para os Estados, e revisaremos as solucións adoptadas. Finalmente, abordaremos o futuro da relación entre ambas as partes e as posibles vías para resolver os problemas derivados do exercicio da liberdade de establecemento no contexto posterior ao Brexit.

Dirección
HERNANDEZ RODRIGUEZ, FRANCISCO (Titoría)

Tribunal
Miguez Macho, Luis (Presidente/a)
Garrido Juncal, Andrea (Secretario/a)
Dias Meireles, Ana Isa (Vogal)

Resumo
Este traballo analizará a IA e a transformación dixital dos dereitos fundamentais das persoas maiores nun contexto marcado polo envellecemento da poboación. Estudará a responsabilidade xurídica derivada do uso da IA en entornos xeriátricos, destacando as lagoas na lexislación en relación cos danos causados polos sistemas automatizados, destacando os riscos da exclusión algorítmica e a necesidade de adaptar a lexislación vixente. Tamén examina o principio de non discriminación por idade, propoñendo unha gobernanza ética e inclusiva que incorpore a participación cidadá para garantir a transparencia, a equidade e a responsabilidade. Explorará tamén a transformación dixital e a súa relación cos dereitos fundamentais, identificando oportunidades e desafíos en áreas como a privacidade, o acceso aos servizos e a igualdade ante a tecnoloxía. Finalmente, aborda as características xurídicas das persoas maiores, salientando a necesidade dunha abordaxe xurídica específica para garantir os dereitos deste grupo vulnerable. O estudo conclúe que se cumpriron os obxectivos propostos, ofrecendo un marco para a reflexión e propostas concretas para unha dixitalización que respecte a dignidade humana e a xustiza social.

Dirección
FERNANDEZ RODRIGUEZ, JOSE JULIO (Titoría)

Tribunal
Miguez Macho, Luis (Presidente/a)
Garrido Juncal, Andrea (Secretario/a)
Dias Meireles, Ana Isa (Vogal)