Vocabularios do SNL

Desde 1993 vimos elaborando e editando vocabularios e glosarios especializados, ata chegar case aos 50 traballos publicados.

Así, ofrecémoslle á comunidade universitaria materiais de apoio que faciliten a utilización do galego nas relacións de ensino-aprendizaxe, na difusión da investigación e nas actividades administrativas. Poden consultarse na lapela Lista de traballos.

Esta produción organízase en tres coleccións:

1. Vocabularios
   Son traballos que abranguen grandes áreas de especialidade (normalmente o ámbito dunha titulación) e que compilan e presentan un número relativamente alto de conceptos (entre 4000 e 5000, normalmente)
2. Léxicos
   Son traballos que se centran en áreas de especialidade máis restrinxidas e que compilan un número de de conceptos menor ca os vocabularios (entre 1000 e 3000, normalmente).
3. Termos esenciais
   Son traballos pensados especificamente para o alumnado, tanto no seu deseño e formato como no seu contido: recollen terminoloxía básica de áreas de especialidade relevantes nos plans de estudo de diferentes titulacións.

Todos estes materiais difúndense a través de soportes diversos:

• Ata o ano 2018, distribuíanse de balde en formato impreso entre os membros da comunidade universitaria, ben a través do propio SNL ou das comisións de normalización lingüística dos diferentes centros da USC, que podían optar ademais, por formatos alternativos, como os cartafoles terminolóxicos.
• En formato electrónico distribúense libremente desde esta páxina, en diferentes formatos. Ademais, desde maio de 2013, difúndense baixo a licenza Recoñecemento-Compartir Igual 3.0 de Creative Commons, o que permite copialos, facer obras derivadas ou un uso comercial deles sempre que se recoñeza a autoría e se compartan baixo a mesma licenza.
• Ademais, intégranse en bUSCatermos, de tal xeito que os membros da comunidade universitaria da USC poden facer unha busca puntual en todos eles -e noutras moitas fontes- de xeito simultáneo.

En 2013 o Servizo de Normalización Lingüística da USC acordou protexer a súa produción de glosarios coa licenza Creative Commons Recoñecemento-CompartirIgual (CC-BY-SA 4.0). Isto deixa sen efecto todas as mencións que neses traballos se poidan atopar referidas á protección dos seus contidos a través da figura do copyright (©).

Este cambio de licenza non se aplica aos traballos elaborados no marco da Rede Panlatina de Terminoloxía (Realiter), pois neles o SNL ten unicamente dereitos sobre os contidos referidos á lingua galega, e non sobre a publicación íntegra.