Obradoiro Construíndo un círculo de coidados. Unha pedagoxía feminista dos afectos

Obxectivos

• Estimular un desenvolvemento integral non sexista.
• Estimular un desenvolvemento integral feminista e queer.
• Apoderar á mocidade, buscando liberala de posibles restricións asociadas ao sexo/xénero e/ou á orientación sexual, a súa orixe étnica, poder adquisitivo, aspecto...
• Educar ás persoas na busca da liberdade, entendendo ao individuo como un todo, parte dun conxunto máis amplo; potenciando a conciencia e a sensibilidade, respectando e poñendo en valor as súas particularidades e diferenzas.
• Contribuír á aprendizaxe e ao adestramento das competencias emocionais, sentimentais e sociais máis significativas para esta etapa da vida: a conciencia e a regulación emocional e sentimental, a autonomía crítica, as competencias sociais, e as competencias para a vida e o benestar.
• Transformar a realidade, lastrada pola herdanza dunha construción sociocultural cisheteropatriarcal, racista, clasista, capacitista, especista..., compensando as desigualdades e desfacendo as opresión.
• Previr a violencia, entre iguais e de xénero, como posibles condutas de risco, ademais das discriminacións por razóns de orientación sexual, sexo/xénero, orixe familiar, capacidades, etnia etc.

Contidos

1. A identidade como subxectividade no plano persoal e no social.
2. Descubrimento, comprensión e regulación dos sentires.
3. Disidencias e diversidades sexuais e vinculares.
4. Vínculos saudables: a constitución das relacións interpersoais desde a sensibilidade e a horizontalidade

Metodoloxía

Empregarase unha metodoloxía de carácter grupal, activa, dinámica e participativa. As sesións desenvolveranse, no caso do grupo presencial, no espazo facilitado pola Universidade para tal fin e, no caso do grupo virtual, a través da plataforma telemática MS Teams, na que é posible a interacción síncrona, con vídeo e mais con audio.

Basearanse en explicacións, simulacións, dinámicas de grupo, discusións e debates. Estas actividades fomentarán a análise da linguaxe empregada, dos estereotipos interiorizados, das mensaxes recibidas a través dos medios de comunicación, dos obxectos culturais, da sociocultura en xeral, a fin de valorar a influencia de todos estes elementos na construción das actitudes, pensamentos, sentires e comportamentos individuais e colectivos.

Docentes

Aixa Permuy Martínez, membro do Seminario Permanente de Emocionalidade, Xéneros e Desenvolvemento Humano (EXDEHU) do Instituto de Ciencias da Educación (ICE-USC).

Colectivo ao que vai dirixido

Alumnado das titulacións de grao e máster da USC.

Duración

A duración do proceso formativo será de 15 horas presenciais e 10 horas de traballo persoal.

Avaliación

Avaliarase a participación, o interese, o traballo e actividades realizadas polo alumnado, así como o emprego e aproveitamento dos recursos e materiais. O alumnado terá que entregar un informe final, na forma dun diario de sesións que recolla as reflexións xurdidas na vivencia do obradoiro.

Recoñecemento

Recoñecemento con 1 crédito optativo para todas as titulacións de grao da USC. Debe realizarse o 90 % do total das horas para optar ao seu recoñecemento.