Esta edición do programa Faíscas Culturais é unha reflexión arredor da domus do Mitreo, desde como se integraba na paisaxe urbana, cales eran os fundamentos antropolóxicos da alimentación, ou como evolucionaron os coidados na época romana
O 2 de abril ás 17.00 horas haberá unha charla da profesora 'Alba Díaz Geada na Casa do Saber do campus de Lugo sobre 'A escola da Domus' á que asistirá o estudantado da Facultade de Formación do Profesorado. A entrada está aberta para toda a comunidade universitaria. Ademais, o estudantado participante na faísca poderá realizar unha visita guiada con Celso Rodríguez Cao á Domus do Mitreo.
"Nesta charla, en primeiro lugar situaremos a Domus no contexto da romanización da Galiza e, máis particularmente, do papel de Lucus Augusti no contexto da Gallaecia romana. A través da Domus, tentariamos achegarnos á historia social daquel tempo. Logo, revisaremos os recursos didácticos que están dispoñibles na páxina web da Domus do Mitreo. Reflexionaremos co estudantado sobre as posibilidades de desenvolver actividades de educación patrimonial a partir do coñecemento e dos recursos da Domus do Mitreo. E para finalizar situaremos ese espazo museístico no contexto dos diferentes espazos musealizados do Lugo do tempo da romanización", indica a poñente Alba Díaz Geada.
O programa Faíscas Culturais é unha iniciativa da Vicerreitoría de Estudantes e Cultura que ten como obxectivo prender a reflexión cultural nas aulas da USC e complementar a formación do estudantado a través de intervencións e actividades de carácter cultural.
