Biblioteca Xeral

Coleccións

A colección de libros, revistas, mapas e outros materiais bibliográficos permiten comprobar por exemplo a riqueza cultural das ordes relixiosas, como se pode apreciar nas valiosas contribucións bibliográficas recibidas con motivo da expulsión dos xesuítas no século XVIII e da desamortización do século XIX; pódese apreciar o influxo do  movemento intelectual da Ilustración (época de consolidación e esplendor desta biblioteca) e coñecer as lecturas que construíron o pensamento de ilustres galegos como Manuel Ventura Figueroa, o arcebispo Lago González, Jacobo de Parga y Puga ou o escultor  Felipe de Castro. Pódese rastrexar a influencia de Italia na cultura do Renacemento en España, coñecer un dos conxuntos bibliográficos singulares máis interesantes, a Biblioteca América, ou trazar a historia cultural de Galicia a través do seu fondo galego. Na actualidade, a Biblioteca Xeral acolle máis de 300.000 volumes e 4.700 publicacións periódicas.

Fondo histórico

A Biblioteca conta con 862 manuscritos, 141 incunables, 27.725  impresos dos séculos XVI ao XVIII e 29.727 impresos publicados entre 1801 e 1900, polo que atinxe ao fondo histórico.

Dos manuscritos da biblioteca unha gran parte procede do Colexio da Compañía de Xesús en Santiago. Do colexio de Monterrei proceden as dúas biblias máis antigas, ambas as dúas en vitela, unha delas con capitais miniadas (aínda que se conservan poucas) e datada a finais do século XIII e outra do século XIV sen iluminacións. Igualmente elevado é o número de manuscritos procedentes da antiga librería do Mosteiro de San Martiño Pinario. A xoia máis prezada da colección, o Diurnal ou Libro de Horas de Fernando I, procede precisamente dela. O manuscrito datado en 1055 destaca pola súa extraordinaria execución.

Dentro dos incunables da biblioteca atopamos o Fasciculus temporum de Werner Rolewinc (Venecia, 1479), exemplar moi fermoso e raro, a Divina Comedia de Dante (Florencia, 1481) nunha edición especialmente coidada, o Doctrinal de los caballeros de Afonso García de Santamaría, impreso por Fadrique Alemán en Burgos en 1487 e, destacado pola súa curiosidade e carácter único, Materies Gramaticae de Fernando Nepos, encadernado coa Gramatica latina de Juan de Pastrana e impreso en Salamanca cara a 1485.

Do século XVI ao XVIII a biblioteca posúe un bo número de edicións raras ou únicas, que abranguen unha ampla variedade de temas e nas que destaca a valía dos autores e o preciosismo das edicións. O século XIX, pródigo en avances científicos, provocará a presenza na colección de obras de Buffon, Cuvier, Humboldt e dos galegos José Rodríguez e Antonio Casares Rodríguez, entre outros.  

Outros fondos 

A Biblioteca Xeral  conta con coleccións especialmente relevantes polo seu carácter único e a súa riqueza: a Biblioteca América e a sección Galicia.

Unha das secciones especialmente coidadas da colección é o fondo Galicia no que están representadas obras de tema galego en calquera idioma, escritas en galego con independencia do seu lugar de publicación e todas as obras de autores galegos e/ou editadas en Galicia, prestando especial atención ao fondo retrospectivo. Certamente valiosa para os investigadores, especialmente polo que atinxe á historia de Galicia, é o fondo en depósito da Real Sociedad Económica de Amigos del País.

A Biblioteca América nace grazas ao impulso de Gumersindo Busto, emigrante galego en América, que nos primeiros anos do século XX conseguiu reunir un número importante de libros, folletos e obxectos diversos de diferentes procedencias. A riqueza da colección, especialmente en fondos do XIX e en obras relacionadas coas primeiras independencias americanas, convértea nun dos sinais de identidade da Biblioteca Universitaria. Os fondos teñen carácter multidisciplinar e enciclopédico.

Na Biblioteca Xeral pódense igualmente consultar un gran número de fontes de referencia e información bibliográfica, unha ampla colección de prensa, cun número importante de cabeceiras galegas, e obras de carácter multidisciplinar.