Traballo Fin de Grao

O Traballo de Fin de Grao (TFG) é unha materia de 6 créditos ECTS de cuarto curso do Grao. Nela o/a alumno/a deberá realizar e presentar un traballo orixinal no que demostre as competencias adquiridas ao longo dos seus estudos de grao. No TFG o/a estudante debe elaborar unha memoria escrita e, posteriormente, expoñela e defendela.
O TFG incluirá, como mínimo, tarefas de busca e revisión bibliográfica, lectura e integración de información, elaboración de información relevante, redacción e presentación. Dependendo da temática que se aborde poderá incluír, ademais, unha parte empírica sinxela ou unha análise de casos.

Aínda que é unha materia mais do Grao, a principal diferenza cas outras é que nela corresponde ao estudante a planificación do seu desenvolvemento. O TFG debe ser froito do traballo autónomo do/a estudante que asume a responsabilidade do seu proceso de aprendizaxe, para o que contará co apoio dun titor.

Aínda que é unha materia mais do Grao, a principal diferenza cas outras é que nela corresponde ao estudante a planificación do seu desenvolvemento. O TFG debe ser froito do traballo autónomo do/a estudante que asume a responsabilidade do seu proceso de aprendizaxe, para o que contará co apoio dun titor.

O TFG é unha oportunidade para que o alumno/a afonde nun tema vinculado aos seus estudos.
O TFG deberá versar sobre un tema relacionado coa titulación; deberá ser orixinal, cunha extensión de entre 6.000 e 10.000 palabras e deberá cumprir obrigatoriamente os requisitos formais que se detallan na Guía Docente da materia.

Elección do título
O título é o aspecto específico sobre o que se vai traballar . A Comisión do TFG aprobará a asignación de títulos e titores, que se realizará de acordo aos criterios indicados na Guía Docente da materia.

A normativa aplicable ao TFG aparece publicada na Web do TFG da Facultade.
Ademais se ofrecerán outros recursos de apoio en dita Web, ou noutros medios que se indiquen na Guía Docente.

- Ser capaz de definir os obxectivos do traballo, identificando o problema a resolver ou o obxectivo de coñecemento a alcanzar.

- Ser capaz de deseñar as tarefas, organizar os pasos a seguir para alcanzar os obxectivos e desenvolver o traballo de acordo co plan definido.

- Saber buscar e seleccionar información relevante para o caso, problema ou obxecto de estudo, a partir de fontes do nivel de libros de texto avanzados, e incorporando algunhas achegas de textos científicos especializados.

- Facer uso dos coñecementos adquiridos ao longo dos estudos que sexan pertinentes para o obxecto do traballo, e integrar con eles a nova información conseguida.

- Ser capaz de organizar a información da que dispón e presentala de forma clara, sistemática e precisa, para que sexa comprendida por outras persoas.

- Saber identificar as limitacións e/ou carencias do traballo realizado e propoñer suxestións de cara ao futuro.

Canles de información

Ademais deste programa, elaborouse unha Guía Docente ampliada do TFG na que se explica polo miúdo a metodoloxía da ensinanza, o calendario, o procedemento de asignación de temas e titores e de elección do título, o procedemento e os criterios de avaliación, o estilo da memoria escrita e os recursos de apoio básicos.
Esa Guía Docente ampliada e outra información relativa ao TFG están dispoñibles na web do TFG da Facultade.
Para explicar a Guía Docente e responder ás dúbidas, celebrarase unha sesión de presentación en setembro.

Actividades do proceso de aprendizaxe no TFG

Aínda que o TFG é unha materia da titulación, ten características que a diferencian claramente do resto en canto á metodoloxía da ensinanza. Nesta materia, é o alumno/a o responsable do seu aprendizaxe e a quen corresponde determinar a orientación e a planificación do seu traballo, contando co apoio dun titor/a. Trátase, por tanto, dun traballo autónomo tutelado.
No proceso de aprendizaxe da materia TFG na Facultade combínanse cinco tipos de actividades:

a) Sesión de presentación
Nela explícanse os contidos da guía docente, a normativa e os recursos de apoio dispoñibles.
b) Sesións de traballo
O alumno/a e o titor/a deberán programar as sesións de traballo. Referímonos a elas mais abaixo.
c) Titorías
O alumno/a poderá dispoñer das horas de titorías que se indiquen na Guía Docente.
d) Traballo autónomo do alumno
É o groso do TFG. O alumno/a deberá efectuar por si mesmo o traballo a partir dos apoios recibidos no resto das actividades. Esta tarefa permítelle ao alumno/a afondar nun tema do ámbito da titulación, formar a súa propia opinión sobre o mesmo e desenvolver as competencias adquiridas ao longo do grao.
e) Avaliación
Ademais de entregar a memoria escrita, o alumno/a deberá presentala e defendela.

Para a elaboración do TFG é altamente recomendable a realización do "Curso avanzado de formación en competencias en información" impartido pola Biblioteca da Facultade de Ciencias Económicas e Empresariais.



Planificación das sesións de traballo

O alumno/a e o titor/a deberán programar as sesións de traballo.
Nas sesión de traballo o alumno/a e o titor/a reúnense para discutir e orientar a planificación, desenvolvemento e calidade do traballo. Aínda que o traballo autónomo do alumno/a é a base do TFG, estas sesións son o elemento de apoio máis importante co que conta nesa tarefa dado que é nelas onde obtén o consello do titor/a e onde pode expoñer e debater a súa perspectiva do tema obxecto do traballo.
A programación das sesións implica que o alumno/a e o titor/a deben acordar:
1) as datas nas que se realizarán e a duración das mesmas e
2) os documentos, ou a parte deles, que debe achegar o alumno para traballar en cada unha delas.

Requerimiento de orixinalidade

Na realización dos exercicios e traballos encomendados ou dos exames co obxecto de ser avaliados, deben seguirse certos estándares:
- Toda reprodución literal total ou parcial (cita textual) tomada dun libro, revista, publicación electrónica, páxina web, etc. debe citarse, referenciando correctamente a fonte de onde se tomou e a páxina, de modo que se poida comprobar que a cita é correcta.
- Tamén deberá facerse dita referencia se é tomada a idea principal doutro texto aínda que baixo unha nova redacción. Neste caso non é necesario indicar a páxina.
- De non seguirse estas normas, considerarase que se está realizando un plaxio, é dicir, unha copia no substancial de obras alleas, facéndoas pasar como propias.
- Tamén se considerará plaxio se dita copia se fai doutro compañeiro ou compañeira, facéndose pasar como autor/a do documento, ou se entrega un documento que foi escrito por outra persoa, ou o uso indebido das tecnoloxías na realización de tarefas ou probas.

Para os casos de realización fraudulenta de exercicios, traballos ou probas será de aplicación o recollido na Normativa de avaliación do rendemento académico dos estudantes e de revisión de cualificacións da USC.

Artelláronse dous procedementos alternativos para a avaliación do TFG: (1) Avaliación por Tribunal e (2) Avaliación polo titor/a. Estes procedementos explícanse polo miúdo na Guía Docente da materia.
O titor/a do TFG elaborará, en calquera caso, un informe que deberá terse en conta no momento de cualificar o traballo.

Aspectos que se avalían e ponderación

Avaliarase a memoria escrita depositada e a exposición oral e defensa da mesma.
Valoraranse os seguintes aspectos:
a) Calidade do proxecto (50%)
b) Presentación escrita (15%)
c) Exposición oral e defensa (35%)



No caso da avaliación polo titor/a, o/a estudante non poderá obter unha cualificación superior a 7,5 puntos, como se explica na Guía Docente.

A materia é de 6 créditos ECTS, o que supón unha dedicación de 150 horas, incluídas as sesións de traballo e a exposición e defensa do traballo. Tendo en conta que desde o comezo do segundo semestre ata a data de depósito transcorren aproximadamente 20 semanas, suporía 7,5 horas cada semana.

Na Guía Docente da materia detállase a distribución do tempo por actividades.

As recomendacións precisas para a planificación e desenvolvemento da materia recóllense na Guía Docente, que estará dispoñible na web do TFG da Facultade.

Recoméndase a asistencia á Sesión de Presentación que se realizará ao comezo do curso académico.
Para a elaboración do TFG é altamente recomendable a realización do "Curso avanzado de formación en competencias en información" impartido pola Biblioteca da Facultade de Ciencias Económicas e Empresariais.

É moi importante que o alumno/a se manteña informado sobre as datas do calendario dos TFG que aparecerán publicadas na web do TFG da Facultade.