Grao en Empresa e Tecnoloxía

• Número mínimo de créditos ECTS de matrícula por estudante e período lectivo

  1.- O alumnado de primeiro curso por primeira vez a tempo completo ten que matricular 60 créditos.
  Un 15% do alumnado poderá cursar estudos a tempo parcial (30 créditos).
  2.- Continuación de estudos : libre cun máximo de 75 créditos.

• Acción titorial e acollida

  A Facultade de Administración e Dirección de Empresas conta cun Plan de Acción Tutorial que comprende actividades de acollida e orientación dirixidas aos estudantes no momento da súa incorporación á universidade e tamén ao longo dos seus estudos. Realízase coa finalidade de favorecer a integración do estudante no contorno universitario, estimular a súa aprendizaxe e apoiar o deseño da súa carreira profesional e a procura de emprego.

  A continuación, detállanse as liñas de actuación do Plan de Acción Tutorial da Facultade:

  Orientación a estudantes de novo ingreso:

  -Presentación da Facultade. O primeiro día lectivo do curso o equipo de goberno da Facultade organiza unha sesión informativa dirixida especialmente aos estudantes de primeiro curso coa finalidade de favorecer a súa integración. Nesta sesión realízase unha presentación dos órganos de goberno, dos servizos e infraestruturas dos que dispón o centro e das normativas máis importantes da USC en materia de estudantes.
  -Presentación da Biblioteca Intercentros. O persoal da Biblioteca Intercentros do Campus de Lugo fai unha presentación na Facultade dos distintos servizos que ofrece ao alumnado.
  -Xornada de benvida aos novos estudantes do Campus. O Vicerreitorado de Coordinación do Campus de Lugo organiza unha xornada de benvida dirixida aos alumnos/as de novo ingreso no Campus. Nesta xornada, entre outras actividades, os responsábeis dos distintos servizos con que conta a USC no Campus preséntanse e póñense a disposición dos alumnos/as.
  -Conferencia na Facultade sobre o proceso de adaptación ao sistema de Boloña baixo a perspectiva do traballo do estudante.
  -Acompañamento através do Programa de Alumnos Titores da USC. Este programa ten como obxectivo que os estudantes seleccionados asesoren e orienten os estudantes de novo ingreso. Para iso realizan previamente un curso de formación.
  -Orientación ao longo dos estudos:
  -Sesión informativa sobre programas de mobilidade.
  -Sesión informativa sobre o Traballo de Fin de Grao.
  -Sesión informativa sobre o programa de prácticas externas.
  -Programa de Apoio Tutorial Extraordinario da USC para axudar aos estudantes a superar as materias que lles presentan especiais dificultades.
  -Orientación para a toma de decisións ao finalizar os estudos:

  -Conferencias sobre procura de emprego e emprendemento.
  -Sesión informativa sobre oferta de formación de posgrao.

  Complementario ao Plan de Acción Tutorial da Facultade, o Grado en Empresa e Tecnoloxía implementará a través da figura do Titor/a Persoal unha actuación específica consistente no acompañamento e seguimento do alumnado ao longo de todo o proceso formativo. Os principais obxectivos desta actuación son:

  -Favorecer a educación integral dos alumnos.
  -Potenciar unha educación o máis personalizada posíbel e que teña en conta as necesidades de cada alumno/a e recorrer aos apoios ou actividades axeitados.
  -Promover o esforzo individual e o traballo en equipo.

  Asignarase a cada Titor/a Persoal, que será un/a profesor/a de a titulación, un grupo de alumnos/as para que realice o seu seguimento. Para iso disporá da seguinte información, que lle facilitará o/a profesor/a de cada materia, para un mellor seguimento do alumno/a e ofrecerlle unha orientación adecuada:

  -O acceso de cada usuario aos contidos teóricos do curso ademais do tempo de acceso.
  -A utilización das ferramentas de comunicación da plataforma (chats, foros, grupos de discusión).
  -Os resultados dos test e actividades enviadas a través do campus.

  A USC ten un programa de alumnos titores para as titulacións de grao, de forma que alumnos de últimos cursos, logo dunha formación que lles facilita a Universidade, realizan tarefas de orientación aos alumnos que inician os estudos.

  Información programa alumnos titores:

  Programa alumnos titores

• Criterios de suspensión do título

  Cando se produza a suspensión dun título oficial, a USC garante o adecuado desenvolvemento efectivo das ensinanzas que iniciasen os seus estudantes ata a súa finalización. Para iso, o Consello de Goberno aproba os criterios relacionados, entre outros, con:

  • A admisión de matrículas de novo ingreso na titulación.
  • A supresión gradual da impartición da docencia.
  • Se o título extinguido é substituído por outro similar (modificando a natureza do título), fixa as condicións que faciliten aos/as estudantes a continuidade de estudos no novo título e as equivalencias entre as materias dun e doutro plan.

• Criterios de acceso e admisión

  Os xerais para as titulacións de grao.

  Non se contemplan condicións nin probas de acceso especiais

A Facultade de Administración e Dirección de Empresas ten a súa sede nun edificio moderno, funcional e adaptado ás persoas con discapacidade.

Os espazos dedicados á docencia son 8 aulas de gran capacidade, 4 aulas de informática e 4 seminarios. Todos eles están equipados con ordenador, pizarra dixital e proxector de vídeo, e contan cos medios técnicos necesarios para impartir docencia en streaming.

Entre os espazos para uso do alumnado destacan a sala de lectura e a sala de traballo en grupo, con capacidade para 40 estudantes cada unha. Sinalar tamén que a Biblioteca Intercentros do Campus de Lugo está situada a escasos metros da Facultade e conta con máis de 1600 postos de consulta repartidos en 9 salas, incluíndo unha sala de traballo en grupo.

Para a celebración de xornadas, conferencias, etc., o centro conta cunha aula magna e cun salón de graos con capacidade para 240 e 91 persoas respectivamente. Tamén dispón dunha sala de xuntas preparada para a realización de videoconferencias con capacidade para 30 persoas.

En todos os espazos do centro está garantido o acceso a internet de calidade, tanto por cable como por wifi.

Por último, destacar que a Facultade dispón de servizo de cafetería e comedor con prezos regulados.

O novo Grao de Empresa e Tecnoloxía está orientado á formación de profesionais cunha mentalidade flexíbel e con visión de futuro, cuns amplos coñecementos nas tecnoloxías de información e a comunicación (TIC), e no manexo e análise de información para poderen adoptar decisións empresariais con maiores garantías de éxito. A capacitación en competencias tecnolóxicas no sistema educativo maniféstase como un alicerce básico para aumentar a competitividade das empresas, co obxectivo final de mellorar o desenvolvemento económico e contribuír ao benestar social. Polo que o novo impartirá coñecementos específicos de materias empresariais e tecnolóxicas, promovendo dun xeito práctico o desenvolvemento de habilidades directivas para a iniciativa empresarial, como o liderado, a iniciativa, a creatividade, a toma de decisións, a comunicación e o traballo en equipo, entre outros.

Outro dos obxectivos fundamentais formulados para o Grao en Empresa e Tecnoloxía é a formación de profesionais que poidan exercer de ponte de comunicación entre as comunidades técnicas e de xestión das organizacións, proporcionando á xestión novas formas de utilizar a tecnoloxía e facilitando aos tecnólogos orientación sobre que crear ou como adaptar mellor as súas creacións ás necesidades reais do negocio.

• Competencias básicas

  - Que os estudantes demostren posuír e comprender coñecementos nunha área de estudo que parte da base da educación secundaria xeral, e adóitase atopar a un nivel que, aínda que se apoia en libros de texto avanzados, inclúe tamén algúns aspectos que implican coñecementos procedentes da vangarda do seu campo de estudo

  - Que os estudantes saiban aplicar os seus coñecementos ao seu traballo ou vocación dunha forma profesional e posúan as competencias que adoitan demostrarse por medio da elaboración e defensa de argumentos e a resolución de problemas dentro da súa área de estudo

  - Que os estudantes teñan a capacidade de reunir e interpretar datos relevantes (normalmente dentro da súa área de estudo) para emitiren xuízos que inclúan unha reflexión sobre temas relevantes de índole social, científica ou ética

  - Que os estudantes poidan transmitir información, ideas, problemas e solucións a un público tanto especializado como non especializado

  - Que os estudantes desenvolvan aquelas habilidades de aprendizaxe necesarias para emprender estudos posteriores cun alto grao de autonomía

• Competencias xerais

  - Adquirir un conxunto de coñecementos teóricos e prácticos en relación co proceso de creación e administración de empresas na era dixital.
  - Identificar, reunir, analizar e interpretar datos relevantes sobre cuestións relacionadas co ámbito empresarial e tecnolóxico.
  - Aprender a planificar e implantar as novas tecnoloxías para contribuír á mellora da competitividade das empresas.
  - Desenvolver un pensamento e razoamento crítico, incluíndo reflexións éticas sobre temas fundamentais de carácter empresarial e económico na era dixital, e comunicalos de xeito efectivo, tanto en galego como en castelán e inglés.
  - Capacidade de análise do comportamento dos axentes económicos e do funcionamento dos mercados e o seu papel nos procesos de transformación dixital.
  - Capacidade de liderado e organización do traballo, tanto individual como colaborativo, e de adaptación a un contorno en constante cambio e evolución.
  - Coñecer e empregar correctamente as ferramentas informáticas e as novas tecnoloxías relacionadas coa xestión empresarial.

• Competencias específicas

  - Deseñar e xestionar a estratexia de recursos humanos, integrando as novas formas de contratación e traballo, e desenvolvendo as habilidades directivas necesarias.
  - Coñecer os fundamentos xurídicos do sistema económico e fiscal español e internacional que afectan á actividade empresarial e as particularidades en relación coa contratación electrónica e a xestión da información.
  - Identificar fontes de información fiable, elaborar e interpretar a dita información utilizando as técnicas de análise e as ferramentas matemáticas, estatísticas e tecnolóxicas apropiadas para dar apoio á toma de decisións.
  - Coñecer e saber utilizar ferramentas e mecanismos de representación, almacenaxe, transformación, análise e comunicación da información de xeito fiábel e eficiente.
  - Comprender as posibilidades do Big Data e a intelixencia artificial e de negocio para a mellora dos procesos empresariais e coñecer os requirimientos para a súa implantación.
  - Entender os sistemas de información empresarial, tomando en consideración as súas tres dimensións específicas (informacional, tecnolóxica e organizativa) e tomar decisións relacionadas coa súa especificación, deseño e implantación.
  - Propoñer e codirixir a integración dos sistemas de información avanzados e coñecer as súas aplicacións nos distintos ámbitos da xestión da empresa, atendendo a requisitos de calidade, seguridade e protección da información, facendo uso da criptografía, intelixencia artificial e big data.
  - Coñecer o uso e programación de sistemas informáticos, bases de datos, criptografía e cadeas de bloques para a súa aplicación á xestión e análise da información empresarial e ao deseño e desenvolvemento de produtos, procesos e novos modelos de negocio.
  - Coñecer as tecnoloxías e servizos Web, móbiles, distribuídos e na nube, e poder avaliar as súas capacidades e adecuación para crear novos servizos ou modelos de negocio empresarial ou industrial.
  - Entender os aspectos fundamentais do contorno social e económico a nivel macro e micro, con especial atención ao comportamento do consumidor e á evolución dos sectores produtivos, no marco global da nova economía e a sociedade da información.
  - Coñecer e comprender os elementos básicos da dirección de empresas e das súas principais áreas funcionais baixo o marco da ética e a responsabilidade social.
  - Analizar, diagnosticar e tomar decisións nas distintas áreas funcionais da xestión de empresas seleccionando e aplicando as ferramentas tecnolóxicas máis apropiadas.
  - Identificar, deseñar, xestionar e avaliar proxectos de creación ou transformación de produtos ou procesos, potenciando a innovación e o emprendemento.
  - Comprender o rol integrador da tecnoloxía e coñecer os principais produtos tecnolóxicos e tendencias da tecnoloxía asociados aos diversos ámbitos da xestión empresarial
  - Desenvolver a análise estratéxica da empresa e o seu contorno para tomar decisións estratéxicas e tácticas nas distintas áreas funcionais, e ser capaz de formular unha estratexia tecnolóxica que dea soporte a un negocio
  - Deseñar e xestionar a estratexia comercial e coñecer novas formas de comercialización nun contexto socioeconómico dixital e globalizado
  - Deseñar e xestionar a estratexia financeira e coñecer novas formas de financiamento nun contexto socioeconómico dixital e globalizado
  - Deseñar e xestionar a estratexia de comunicación nun contorno dixital e globalizado e ser capaz de empregar o idioma inglés con solvencia no ámbito da empresa e a tecnoloxía
  - Deseñar e xestionar a estratexia de operacións e loxística integrando as ferramentas tecnolóxicas máis apropiadas

• Competencias transversais

  - Pensar de forma integrada e crítica, e afrontar os problemas desde diferentes perspectivas.
  - Buscar, procesar, analizar e sintetizar información procedente de distintas fontes.
  - Utilizar e comunicar información en lingua estranxeira.
  - Organizar e planificar o traballo en función dos obxectivos e recursos dispoñíbeis.
  - Capacidade de resolver problemas e tomar decisións aplicando os coñecementos teóricos á práctica.
  - Traballar en equipo, compartindo os coñecementos e sabéndoos comunicar ao resto do equipo e á organización.
  - Comunicación oral e escrita adaptada ás necesidades dos destinatarios.
  - Manter un compromiso ético e mostrar sensibilidade cara a temas sociais ou ambientais.
  - Capacidade para a aprendizaxe autónoma e autoavaliación.
  - Habilidade no manexo de ferramentas de cálculo e tecnoloxías da información e da comunicación (TIC).
  - Desenvolver a creatividade, a iniciativa e o espírito emprendedor.
  - Desenvolver habilidades de negociación, resolución de conflitos e intelixencia emocional.

Mobilidade

A planificación e xestión dos programas de mobilidade de estudantes desenvólvese por medio da actuación coordinada de varios actores: o Vicerreitorado competente en relacións exteriores e o Servizo de Relacións Exteriores da Universidade a nivel centralizado; o Responsábel Académico de Mobilidade (RAM); os Coordinadores Académicos dos distintos programas e a Unidade de Xestión de Centro e Departamentos (UGCD) a nivel de facultade. Cada un deles ten unhas determinadas funcións que veñen recollidas no “Regulamento dos Intercambios Interuniversitarios”.

A mobilidade dos estudantes propios realízase a partir do segundo ano de estudos na titulación, en períodos semestrais ou anuais. A selección e asignación de destinos aos candidatos lévase a cabo de acordo co establecido na convocatoria correspondente e no “Regulamento de Intercambios Interuniversitarios”.

A mobilidade dos/as estudantes está regulada a través do “Regulamento de intercambios interuniversitarios”. A través da Oficina de Relacións Exteriores xestiónanse programas de intercambio tanto nacionais (SICUE), como europeos (ERASMUS) e extracomunitarios (intercambios con países de América Latina ou países de fala inglesa):

Portal Internacional

Prácticas

O alumnado do Grao deberá cursar obrigatoriamente 16,5 créditos de prácticas realizadas en empresas relacionadas coa titulación. Esta materia ofértase no último semestre.

O obxectivo fundamental é que o alumnado desenvolva as competencias adquiridas nas materias do Grao através da súa inmersión nun contorno laboral representativo do seu contexto profesional futuro.

As prácticas organizaranse co fin de garantir a calidade, o recoñecemento académico e o aproveitamento máis axeitado por parte do alumnado. Para iso os estudantes terán un/a titor/a externo/a pertencente á institución en que se levan a cabo as prácticas, que se coordinará cun titor/a académico/a que realizará a avaliación en función da memoria que o estudante realizará e do informe emitido polo/a titor/a externo/a.

Poderán realizarse en organismos ou entidades colaboradoras, tais como empresas, entidades públicas e privadas, relacionadas co ámbito empresarial nun sentido amplo. Tamén poderán realizarse en instalacións da USC.

O alumnado deberá realizar un traballo fin de grao de 6 créditos ofertados no último semestre do título. A temática do TFG debería estar relacionada coas prácticas en empresas, as distintas mencións ou a dixitalización dunha área da empresa.

Ao completar a materia o/a alumno/a será capaz de:

-Realizar e presentar un traballo no cal demostre as competencias adquiridas ao longo dos seus estudos.
-Expoñer verbalmente e por escrito con claridade os aspectos fundamentais do seu traballo, facendo uso da terminoloxía propia empresarial e das tecnoloxías dixitais.