Obradoiro “Construíndo un círculo de coidados. Unha pedagoxía dos afectos”

OBXECTIVOS

• Estimular un desenvolvemento integral feminista e queer.
• Colectvizar os malestares, estimulando a súa análise e transformación, -persoal e grupalmente-.
• Apoderar á mocidade, buscando liberalxs de posibles restricións asociadas ao sexo-xénero e/ou á orientación sexual, a súa orixe étnica, poder adquisitivo, aspecto...
• Educar ás persoas na busca da liberdade, entendendo ao individuo como un todo, parte dun conxunto máis amplo; potenciando a conciencia e a sensibilidade, respectando e poñendo en valor as súas particularidades e diferencias.
• Contribuír á aprendizaxe e ao adestramento de competencias afectivas como: a conciencia sensible e a regulación de afectos, a autonomía crítica, as competencias sociais e as competencias para a vida e o benestar.
• Transformar a realidade, lastrada pola herdanza dunha construción sociocultural cisheteropatriarcal, racista, clasista, capacitista, especista..., compensando as desigualdades e desfacendo as opresións.
• Previr a violencia, -entre iguais, de xénero, por razón de identidade e/ou orientación sexual-, como posibles condutas de risco, ademais das discriminacións por estas e outras razóns como a orixe familiar, as capacidades, a etnia...

CONTIDOS

1. A identidade como subxectividade: no plano persoal e no social
2. Descubrimento, comprensión e regulación dos afectos
3. Disidencias sexuais e vinculares
4. Vínculos saudables: a constitución das relacións interpersoais desde a sensibilidade e a horizontalidade

MÉTODO

Empregarase un método de carácter grupal, activa, dinámica e participativa. As sesións desenvolveranse, no caso do grupo presencial, no espazo facilitado pola Universidade para tal fin e, no caso do grupo virtual, a través da plataforma telemática Microsoft Teams, na que é posible a interacción síncrona, con vídeo e máis con audio. As devanditas sesións basearanse en explicacións, simulacións, dinámicas de grupo, discusións e debates. Fomentarase a análise da linguaxe empregada, dos estereotipos interiorizados, das mensaxes recibidas a través dos medios de comunicación, dos obxectos culturais e da sociocultura en xeral, a fin de valorar a influenza de todos estes elementos na construción das actitudes, pensamentos, afectos e comportamentos individuais e colectivos. 

DOCENTE

Aixa Permuy, profesora e investigadora da Universidade de Santiago de Compostela e membro do CIFEX.

COLECTIVO AO QUE VAI DIRIXIDO

Alumnado das titulacións de grao, máster e doutoramento da Universidade de Santiago de Compostela.

DURACIÓN

A duración do proceso formativo será de 15 horas presenciais e  10 horas non presenciais.