A primeira edición do Campionato de Xogos Atléticos amplía a oferta de actividades deportivas da USC

O I Campionato da USC de Xogos Atléticos disputarase o 9 de abril no Complexo Deportivo do Estadio arredor de cinco modalidades deportivas: lanzamento de xavelina lixeira, salto de altura con axuda de minitramp, salto de lonxitude, circuíto de axilidade por remudas e carreira de remudas en parellas con atado. Esta é unha nova actividade promovida polo Área Deportiva da USC dirixida a equipos formados por un máximo de seis integrantes de calquera dos colectivos que conforman a comunidade universitaria.

A proposta xúntanse a outras iniciativas que nas últimas semanas está a programar a Área Deportiva da USC na procura de ampliar a súa oferta de actividades e facela máis accesible a un maior numero de persoas usuarias. A finalidade é ofrecer novas prácticas deportivas ou formatos que faciliten o acceso dun maior número de persoas á actividade física.

O prazo de inscrición permanecerá aberto ata o 6 de abril, trámite que se poderá formalizar a través da web da Área Deportiva da USC. Cada un dos equipos deberá estar conformado por un máximo de seis integrantes, se ben en cada proba do circuíto so participarán catro competidores, dúas mulleres e dous homes. A composición do equipo para cada unha das cinco probas poderá ser elixido libremente entre os seus integrantes. A puntuación final de cada equipo determinarase pola suma de todos os puntos obtidos en cada unha das cinco estacións, o que permitirá determinar a clasificación final.

Cos resultados colectados, outorgarase trofeo aos tres primeiros equipos clasificados na categoría xeral, ademais dun premio especial para a mellor Residencia/Colexio e para a mellor Facultade ou Escola.