O Salón de Actos da Facultade de Filosofía acolle o 31 de marzo ás 19.00 horas o acto de presentación do libro El calibrador de estrellas, do escritor e consultor de negocios especializado en China Julio Ceballos, e editado por Planeta. Autor do bestseller Observar el arroz crecer do que agora sae a 6ª edición, Ceballos estará acompañado do director do Idega da USC e vicepresidente da Unión Xeográfica internacional, Rubén Lois. O acto é de entrada libre ata completar a capacidade da sala.
A obra, definida polo autor como un manual de «aprendizaxes chinesas para Occidente no século XXI», ofrece unha visión única sobre como Oriente pode axudarnos a entender e afrontar os desafíos do mundo actual.
El calibrador de estrellas (Ariel) toma o seu nome dun antigo instrumento de navegación marítima e tamén do que é considerado o poema máis complexo da historia. A partir destes dous conceptos, Ceballos estrutura o libro arredor de 18 plug-ins, complementos ou ensinanzas para comprender China como un referente estratéxico no contexto global actual.
Julio Ceballos, residente en China desde 2006, é un dos máis reputados expertos en negocios e cultura do país asiático. A presentación do libro en Santiago de Compostela converterase nunha oportunidade única para achegarse á realidade chinesa de primeira man.