A avogada indixenista Adriele Andrade Précoma participa nos Encontros Americanos na Granell
A avogada popular e indixenista brasileira Adriele Andrade Précoma será quen interveña o 26 de marzo nunha nova sesión dos Encontros Americanos na Granell. Neste caso, farao ás 19.00 horas na sede da Fundación Eugenio Granell (Praza do Toural s/n, Santiago de Compostela) coa conferencia ‘Patrimonio, dereitos e pobos indíxenas en Brasil’.
Na actualidade, Brasil mantén relacións coloniais cos pobos indíxenas e comunidades tradicionais que viven nos territorios nos que se forxou o Estado nacional. Na súa charla, Andrade Précoma explicará como nesta relación o Estado se alía coas incursións extractivas de privatización da natureza e sobre os territorios daquelas poboacións; e como aínda que normativas internas e internacionais prescriban dereitos para pobos e comunidades, estes están en risco de desaparición polos avances extractivos do capital. “Ante isto, os pobos loitan polos seus dereitos, entre eles o da consulta e consentimento libre, previo e informado, que lles garanta decidir as súas propias dinámicas de desenvolvemento con autonomía”, afirma.
A relatora
Adriele Andrade Précoma (Curitiba, Paraná, Brasil, 1986) é avogada popular e indixenista. Doutoranda en Dereito Socioambiental na Pontificia Universidade Católica de Paraná (PUC/PR), é investigadora visitante do Grupo de Estudos Territoriais (GET) na Universidade de A Coruña (UDC) cunha beca de internacionalización da Coordinación de Perfeccionamento de Persoal de Nivel Superior (Capes, Brasil). É ademais membro fundadora do Centro de Investigación e Extensión en Dereito Socioambiental (CEPEDIS) e integrante do Observatorio de Protocolos Autónomos de Consulta e Consentimento Libre, Previo e Informado.
Espazo de diálogo e reflexión
Os Encontros Americanos na Granell, organizados polo Grupo de Historia de América da USC e cofinanciados pola Vicerreitoría de Estudantes e Cultura a través da súa convocatoria de axudas de dinamización cultural, teñen como fin ofrecer un espazo aberto de diálogo, ideas, debate e reflexión arredor de América a través dun programa de conferencias mensuais que abordan temas culturais, políticos, sociais, económicos ou de actualidade, de interese público e carácter divulgativo. As persoas participantes son especialistas procedentes do ámbito académico americano, español ou europeo, así como profesionais vencellados á realidade da rexión nas súas múltiples facetas.
