O programa de Faíscas Culturais 'Moito pau e pouca cenoria' xira arredor da peza 'A burra, a mesa e o pau', do Centro Dramático Galego, unha proposta escénica que se achega ao mundo do traballo, á violencia do traballo e ao traballo que invade o ámbito dos fogares
Do 24 ao 27 de marzo, ás 12.00 horas, o estudantado da materia 'Psicoloxía do Traballo e das Organizacións' da Facultade de Psicoloxía debatirá sobre 'O traballo en escena' na Aula 4 da Facultade de Psicoloxía. Esta actividade está aberta tamén a toda a comunidade universitaria.
'A actividade 'O traballo en escena', coordinada polos profesores Carlos Montes e Carlos Dopico-Casal (FPU), busca fomentar unha reflexión crítica sobre a precariedade laboral a través do teatro. A partir da obra A burra, a mesa e o pau, debatenrase na aula conceptos fundamentais da Psicoloxía do Traballo e das Organizacións, como o conflito laboral, as relacións de poder ou a saúde mental no traballo. Ademais, o estudantado investigará casos reais para conectar a ficción teatral coa realidade laboral contemporánea, analizándoos á luz dos contidos da materia e reflexionando sobre o seu impacto na sociedade.', explica Carlos Montes.
O programa Faíscas Culturais é unha iniciativa da Vicerreitoría de Estudantes e Cultura que ten como obxectivo prender a reflexión cultural nas aulas da USC e complementar a formación do estudantado a través de intervencións e actividades de carácter cultural.
