Traballo Fin de Grao

O Traballo Fin de Grao ten como obxectivo a acreditación por parte do alumno dos coñecementos e destrezas adquiridas durante os estudos de grao, a través da elaboración, presentación e defensa dun traballo orixinal centrado nalgún aspecto da Enfermería. De modo concreto:

1. Integrar os coñecementos relativos á profesión enfermeira.
2. Demostrar competencias para planificar, desenvolver, avaliar e innovar a práctica profesional.
3. Desenvolver de forma sistemática un traballo orixinal.

Consistirá na elaboración, por parte do estudante, de forma individual ou en grupo (ata un máximo de 2 alumnos/as) dun traballo orixinal (revisión bibliográfica, traballo de campo ou proxecto de investigación) no que se integren e desenvolvan os coñecementos, capacidades, competencias e habilidades adquiridos durante os estudos do Grao en Enfermaría.
Incluirá, como mínimo, tarefas de busca e revisión bibliográfica, lectura e integración de información, elaboración
de resultados relevantes, redacción, e presentación e defensa do traballo.
Estrutura do traballo:
-O TFG terá unha portada na que conste o título do traballo, o nome e apelidos do estudante e do titor/a, a convocatoria e o ano.
-No caso da modalidade traballo de campo ou revisión bibliográfica incluirá, a lo menos, os seguintes apartados: Índice
Resumo estruturado de máximo 300 palabras (introducción, obxectivos, métodos, resultados e conclusións)
Introdución
Xustificación
Obxectivos
Hipótese (se procede)
Métodos
Resultados
Discusión
Conclusións
Bibliografía
Anexos (se procede).

No caso da modalidade proxecto incluirá, a lo menos, os seguintes apartados:
Índice
Resumo estruturado de máximo 300 palabras (introducción, obxectivos, métodos)
Introdución
Xustificación
Obxectivos
Hipótese
Métodos
Cronograma de tarefas
Viabilidade e costos
Resultados esperados
Bibliografía
Anexos (se procede).

-O número máximo de citas bibliográficas será de 30.
-O TFG estará paxinado, cunha extensión máxima de 20 páxinas dende a Introdución ata as Conclusións. A Bibliografía
xunto cos Anexos Terán un límite de 10 páxinas adicionais.
-Estará escrito en letra Times New Roman tamaño 12 (tamaño 10 para táboas e figuras), ou Arial tamaño 11 (tamaño 9
para táboas e figuras). O interliñado será de 1,5.
-As marxes superior e inferior serán de 3 cm e o esquerdo e dereito serán de 2,5 e 2 cm respectivamente.

A bibliografía será orientada polo titor ou titora do traballo.
En xeral constará de documentos que se refiren a:
- o tema obxecto do traballo
- métodos, procedementos e técnicas de investigación
- orientación sobre a redacción e presentación de traballos académicos.

Por tratarse dunha materia transversal, as competencias serán as propias das materias ás que se vincule, recollidas na ORDE CIN/2134/2008, do 3 de xullo, pola que se establecen os requisitos para a verificación dos títulos universitarios oficiais que habiliten para o exercicio da profesión de Enfermeiro (BOE 19 xullo 2008).

Os TFG estarán orientados á avaliación de competencias asociadas ao grao en Enfermaría como: capacitar para a procura, xestión, organización e interpretación de datos relevantes, emitir xuízos que inclúan unha reflexión sobre temas destacados de índole social, científica, tecnolóxica ou ética, así como todas aquelas que faciliten o desenvolvemento dun pensamento e xuízo crítico, lóxico e creativo.

O titor/a orientará ó estudante no proceso de elaboración do traballo e poderá realizar sesións expositivas co fin de explicar as características xerais dos TFG así como identificar as necesidades formativas máis relevantes. Nas sesións de titorías estableceranse propostas que permitirán adquirir e/ou ampliar a formación en aspectos concretos relativos a coñecementos e habilidades para afrontar o traballo (procura documental, manexo de programas informáticos, etc). As titorías permitirán avaliar o grao de compromiso, responsabilidade e seguimento das orientacións establecidas pola/o titor/a, así como a capacidade de iniciativa e resolución de problemas.

CURSO AVANZADO DE FORMACIÓN EN COMPETENCIAS EN INFORMACIÓN (Biblioteca de Enfermaría e Medicina)
As actividades de traballo autónomo a realizar polo estudante inclúen: lecturas para a definición do marco teórico, elaboración dun guión de contidos. procura, selección e tratamento da información, elaboración do traballo escrito e preparación da presentación.
Para a realización do TFG é altamente recomendable a realización do "Curso avanzado de formación en competencias en información" impartido pola Biblioteca de Medicina e Odontoloxía / Biblioteca de Enfermaría da USC. Dita formación desenvólvese nunha contorna virtual durante catro semanas, cunha inversión en tempo do estudante de 25 horas. As competencias en información inclúense, a nivel do EEES, dentro das competencias dixitais que todo alumnado debe ter adquiridas ao rematar os estudos universitarios, xa que saber xestionar información é unha práctica transversal.O curso está organizado en sete módulos baseados nas competencias a adquirir de acordo a un nivel avanzado: (1) Qué necesito aprender e para que de cara ao Traballo Fin de Grao; (2) Cómo elaborar un Traballo Fin de Grao; (3) A Biblioteca Universitaria (BUSC). Recursos TIC da USC á túa medida; (4) Buscar información; (5) Avaliar e organizar a información; (6) Citar e referenciar a información. Evitar o plaxio; (7) Competencias dixitais. O alumnado considerado apto poderá solicitar na biblioteca do seu centro un diploma expedido pola USC que acredite a superación deste curso. A USC recoñece esta actividade con 1 crédito ECTS que será imputado no expediente a solicitude da persoa interesada. Non se recoñecerá o crédito a aquelas persoas que realicen un curso de competencias en información que non sexa o propio da súa titulación.

As pautas para a defensa dos TFG, composición do tribunal, cualificacións e convocatorias réxense pola Normativa correspondente da Facultade de Enfermaría e, complementariamente, polo Regulamento de matrícula, elaboración e defensa dos TFG e TFM da USC.
Tanto a solicitude de defensa como o depósito do traballo faranse a través da Secretaría virtual do estudante seguindo o procedemento e datas establecidos pola Comisión correspondente, sendo necesario o informe previo do titor/a para o depósito do traballo. As datas de entrega e defensa fixaranse de acordo co calendario académico da USC.
A avaliación dos TFG farase na Facultade de Enfermaría e, cando non sexa posible, noutros centros da USC a través da súa exposición e defensa pública diante dun tribunal.

O tempo máximo do que estudante disporá para a súa exposición ou defensa será de 10 minutos. Cada estudante, sexa cal sexa o xeito de elaboración, deberá defender a totalidade do seu TFG de xeito individual.

A modalidade ordinaria de defensa pública dos traballos será a exposición individual realizada polo estudante de xeito presencial, tanto para os traballos individuais como de grupo.

A cualificación estará vinculada á consecución das citadas competencias e farase segundo os seguintes criterios:
-Informe do titor: 30%
-Memoria do traballo: 50% (25% adecuación dos contidos á estrutura proposta e 25% claridade da exposición dos contidos)
-Defensa: 20% (10% exposición oral e 10% resposta a preguntas / debate).

En todo caso, segundo o artigo 12 do mencionado Regulamento: “Os TFG e TFM deben ser traballos orixinais de elaboración propia e deben citarse debidamente as fontes que se tiveron en conta para a súa realización. O incumprimento do indicado no apartado anterior suporá a cualificación de “suspenso” na convocatoria”.


Os tribunais cualificarán segundo a seguinte escala numérica, de 0 a 10, con expresión dun decimal, á que se engadirá a correspondende cualificación cuantitativa:
- Non Presentado (NP)
- 0-4,9: Suspenso (SS)
- 5,0-6,9: Aprobado (AP)
- 7,0-8,9: Notable (NT)
- 9,0-10: Sobresaliente (SB)

O TFG ten un valor de 6 créditos ECTS, o que equivale a un conxunto de 150 horas de traballo.