Traballo Fin de Grao

1. Datos descritivos da materia.
Carácter: Formación obrigatoria.
Convocatoria: segundo cuadrimestre.
Créditos: 6 ECTS.
Coordinadora: Raquel Sendón García. Departamento de Química Analítica, Nutrición e Bromatoloxía. tel. 881814964; correo electrónico: raquel.sendon@usc.es.
Descrición: o Traballo de Fin de Grao (TFG) en Farmacia con nivel 3 de MECES (TFGM3) consiste na realización, presentación e defensa dun proxecto ou un estudo que supoña a integración da formación recibida ao longo da titulación de Farmacia.
Departamentos participantes: Todos os departamentos da USC con docencia no Grao de Farmacia.

2. Requisitos para iniciar o TFG
Poderán iniciar o traballo, elixindo tema e titor, aqueles estudantes aos que lles quede por superar un máximo de 75 ECTS, incluídas as Prácticas Tuteladas. Será necesario realizar a preinscrición no período indicado no calendario de TFG do curso correspondente publicado na páxina web da Facultade de Farmacia.

1. Actividades formativas

A) Seminarios:
• Aspectos básicos na procura e xestión da información para o TFG. Recoméndase a realización do Curso de competencias en información Farmacia. Nivel avanzado, organizado pola biblioteca de Facultade de Farmacia.
• Claves para a defensa oral do traballo fin de grao.

B) Titorías: O estudante terá que manter ao longo do cuadrimestre polo menos dúas sesións co seu titor, polo menos UNHA documentada. Para a documentación das sesións o titor deberá cubrir a información do Anexo I e introducila no campo correspondente da Secretaría Virtual.

C) Realización, presentación pública e defensa do Traballo Fin de Grao.
Individualmente, o estudante terá que realizar, redactar e defender un traballo, de forma autónoma e titorizado por un profesor, que pode ser de diferentes tipos.

2. Tipos de traballo.
As diferentes modalidades de Traballo Fin de Grao poden ser:
• Proxecto de investigación: O estudante pode levar a cabo un traballo experimental de carácter básico ou aplicado relacionado coa titulación, nun laboratorio universitario ou centro de investigación, así como en empresas e institucións dentro do marco de convenios de estudos.
• Traballos de revisión ou investigación bibliográfica. Recompilación, lectura e análise crítica de traballos centrados nalgún tema de interese en relación coa titulación.
• Proxecto a realizar durante as prácticas tuteladas.
• Estudos técnicos, organizativos e/ou económicos: realización de estudos de equipos, sistemas, servizos, produtos e/ou mercados que traten calquera dos aspectos de deseño, planificación, produción, xestión, explotación, comunicación, información e/ou calquera outro propio da titulación de Farmacia.

3. Estrutura do traballo Fin de Grao.

3.1 Formato do traballo

A memoria do traballo poderá redactarse en castelán ou galego.
Deberá ter unha extensión máxima de 10.000 palabras (excluíndo a bibliografía) e incluír os seguintes apartados:
Portada: segundo o modelo unificado (gañador do concurso de portadas anual correspondente da Facultade de Farmacia). Inclúe o título en castelán ou galego e en inglés, o autor.
Índice: Indicando a páxina correspondente a cada epígrafe.
Resumo: (máximo 250 palabras) en castelán ou galego e en inglés
Palabras clave: 5-6 palabras que definan ou sitúen o TFG no seu ámbito de coñecemento
Introdución/presentación/contextualización do TFG
Obxectivos/hipóteses: Definiranse os obxectivos que o estudante pretende alcanzar coa realización do traballo.
Material e métodos
Resultados/desenvolvemento do traballo
Discusión
Conclusións: Deberán responder de forma clara e concisa aos obxectivos expostos.
Bibliografía: segundo formato unificado (véxase, ficheiro na aula virtual do TFG)
Agradecementos.

A memoria deberá presentarse (no seu formato en papel, encadernado pegado con cantoneira en cor azul) utilizando páxinas tamaño A4, marxes superior e inferior de 3 cm e dereito e esquerdo de 2.5 cm. Interliñado de 1.5. As páxinas deberán ir numeradas na zona inferior central.

A letra seleccionada deberá ser “Sans serif” (sen curvas) (Arial, Calibri, Verdana ou similar). O seu tamaño no texto e os pés de figuras e gráficas non deberá ser inferior a 10.

A formación que se vai desenvolver, de acordo coa ORDE CIN/2137/2008 de 3 de xullo (BOE 174) orientarase cara á consecución das competencias xerais do Grao de Farmacia. Ao finalizar o TFG, o estudante deberá:
• Saber utilizar correctamente as fontes de información científica, incluíndo as que se atopan en lingua inglesa.
• Ser capaz de analizar e sintetizar a información básica tanto en lingua castelá como en lingua inglesa e resumila de forma correcta e intelixible.
• Ser capaz de estruturar, desenvolver e resumir un traballo sobre un aspecto específico da profesión.
• Ser capaz de expor oralmente de forma clara e sintética un informe sobre un aspecto xeral ou concreto da profesión e defendelo publicamente.

Elección de tema e titor. Asignación de temas e titores
O estudante poderá realizar unha proposta propia á comisión de traballos de fin de grao ou ben elixir un tema para o TFG de entre os propostos polos profesores das áreas que imparten docencia na titulación

Propostas dos estudantes:
As propostas dos estudantes deberán contar coa aprobación dun titor e incluír un tema, un obxectivo e un plan de traballo, seguindo o anexo III desta guía docente. Este anexo III será entregado nas datas previstas no calendario do TFG para o curso académico correspondente.

Propostas das áreas
Antes do inicio do curso académico correspondente, dende a Facultade de Farmacia solicitaralles aos departamentos con docencia no Grao de Farmacia, un número de temas de TFG cos seus correspondentes titores calculado en función dos créditos ECTS impartidos por cada área no Grao en Farmacia. Así, farase pública unha única lista anual, que incluirá propostas de todos os ámbitos docentes do plan de estudos.
O estudantes que non presentaran unha proposta propia con anterioridade, elixirán unha proposta de entre as presentadas polas áreas. A elección dos temas propostos polas áreas terá lugar nun acto público, que se celebrará no Salón de Graos da Facultade de Farmacia en dúas ocasións ao longo do curso segundo o calendario de TFG da Facultade de Farmacia, publicado na aula virtual e na páxina web. Para a elección os estudantes ordenaranse en función do seu expediente académico ponderado polo número de créditos superados.
Se o alumno non puidese acudir ao acto público poderá delegar a elección do tema noutra persoa que deberá acudir ao acto cunha copia do DNI do estudante e o anexo II debidamente cuberto e asinado.
O estudante só poderá modificar o titor en casos excepcionais, para o que deberá solicitalo de forma razoada mediante un escrito á Comisión do TFG (Anexo IV) a través da Secretaría do Decanato da Facultade. A Comisión analizará o caso, e se procede, realizará unha nova asignación.

2. Recomendacións para escoller tema de traballo
• Debe tratarse dun tema que sexa orixinal, pertinente, relevante e vinculado coa titulación de Farmacia.
• Debe integrar diferentes coñecementos e habilidades adquiridas no grao.
• Debe contribuír ao avance do teu campo do saber e/ou profesión, ou ser útil socialmente.
• Debe ser beneficioso para a túa inserción laboral ou profesional.
• Sobre todo, debe ser un tema que te apaixone e co que poidas gozar.

1. Exposición e defensa do Traballo Fin de Grao.
O estudante deberá expor o traballo realizado ante un tribunal de avaliación constituído por tres profesores elixidos, de forma rotativa, entre os que imparten docencia na titulación de Farmacia.
O estudante realizará unha breve presentación oral do seu traballo (máximo 10 min) que incluirá polo menos, os obxectivos, a metodoloxía, os resultados e as conclusións do traballo realizado.
A continuación o estudante responderá as preguntas formuladas polos membros do tribunal.

2. Avaliación dos Traballos Fin de Grao.
A matrícula dálle dereito ao alumno a dúas oportunidades de exame. As datas para a defensa do TFG faranse públicas a través da páxina da Facultade de Farmacia e a USC virtual coa suficiente antelación.
A cualificación final do TFG outorgarase en función da rúbrica de avaliación establecida, que considera o informe do titor e a avaliación final do tribunal de avaliación tras a defensa do traballo polo estudante.

Rúbrica de avaliación

1. Avaliación do titor. 20%
1.1. Valoración da memoria (0-5 puntos)
1.2. Valoración da adquisición de competencias (0-5 puntos)

2. Acta do tribunal de avaliación. 80%
Media aritmética das cualificacións dos 3 membros do tribunal
2.1 Valoración da memoria (0-5 puntos)
2.2. Exposición oral e defensa do traballo (0-5 puntos)
2.3. Opción á matrícula de honra.

A cualificación final obterase en función da rúbrica de avaliación mediante a ecuación seguinte:
Cualificación final = Cualificación final do titor * 0.2 + Cualificación final do tribunal *0.8
Cada tribunal de avaliación seleccionará os que considere os mellores traballos (máximo 2) como candidatos á mención de “matrícula de honra”.
Finalizada a avaliación de todos os traballos da convocatoria, as matrículas de honra serán outorgadas pola Comisión de TFG a proposta da coordinadora xunto cos presidentes dos diferentes tribunais de avaliación.

Actividade ----------------Tempo (h) Metodoloxía
Titorías ------------------- 2 ------------------ Formulación e seguimento do TFG. Valoración dos avances e propostas de mellora
Sesión de Avaliación -----1 ------------------ Presentación oral e defensa do proxecto perante a comisión avaliadora
Traballo persoal----------145---------------- Traballo individual e autónomo do estudante, orientado polo titor

Total 150 horas

Recomendacións de cara á avaliación.

Os criterios de avaliación da memoria, a exposición oral e o desenvolvemento das competencias preséntanse nos anexos V e VI na aula virtual da materia. Revísaos en profundidade.

Fai un exercicio de autoavaliación da memoria tendo en consideración cada un dos apartados que o titor e os membros do tribunal avaliador van ter en conta para valorar o teu traballo. Entrega a memoria cando esteas convencido de que obterás unha puntuación alta en cada un dos apartados.

Valora as túas diapositivas en función das instrucións e suxestións para elaborar presentacións de PowerPoint que podes atopar na aula virtual do TFG.

Para que os titores podan avaliar se consideran ou non que o TFG foi plaxiado emplearán a ferramenta antiplaxio Turnitin. Todos os TFG quedarán despois da súa defensa en depósito na plataforma antiplaxio Turnitin.

Toda a información relacionada co Traballo de Fin de Grao aparece na páxina web da Facultade de Farmacia, no apartado do mesmo nome dentro da Guía do curso correspondente e tamén na aula virtual da materia.

Consulta a aula virtual de Traballo Fin de Grao para máis información.

Utiliza o correo institucional (nombrealumno@rai.es)