Mobilidade
Actualmente a Universidade de Santiago de Compostela colabora nos programas Sócrates-Erasmus , Erasmus Mundus e Sicue, que complementa con varios programas que pretenden fomentar a mobilidade dos membros da comunidade universitaria con universidades de América, Asia, Australia e Suiza.
As facultades contan coa colaboración de varios profesores/as que actúan como coordinadores académicos, e cuxa función é tutorizar e asistir nas súas decisións académicas aos estudantes propios e de acollida.
A selección dos candidatos lévaa a cabo, para cada convocatoria ou programa, unha comisión de selección, composta polo decano ou decana, o vicedecano ou vicedecana responsábel de programas de intercambio, o/a responsábel da UAGCD e os/as coordinadores académicos, de acordo con criterios de baremación previamente establecidos, que teñen en conta o expediente académico, unha memoria e, de ser o caso, as competencias en idiomas que esixe a Universidade de destino.
A mobilidade dos/as estudantes está regulada a través do “Regulamento de intercambios interuniversitarios”. A través da Oficina de Relacións Exteriores xestiónanse programas de intercambio tanto nacionais (SICUE), como europeos (ERASMUS) e extracomunitarios (intercambios con países de América Latina ou países de fala inglesa):
Portal Internacional
Prácticas
A cuarta edición do Mestrado en Arqueoloxía e Ciencias da Antigüidade contempla prácticas externas obrigatorias, que se desenvolverán durante un mes. O seu carácter formativo apóiase en torno a dous eixos:
1.- Articular teoría e práctica através da aproximación global aos problemas e situacións, poñendo en xogo os coñecementos conseguidos através das distintas materias do plan de estudos.
2.- Reflexionar sobre a acción permitindo unha aprendizaxe reflexiva, alén da mera acción.
As prácticas sitúan o alumnado en escenarios profesionais reais que favorecen a adquisición de coñecemento e posta en práctica das habilidades e destrezas necesarias na súa futura inserción laboral. Polo tanto, en cada caso o estudantado realizará tarefas e aprenderá metodoloxías de acción relacionadas coa institución seleccionada.
O alumno debe entregar un informe-memoria, cumprindo o calendario estabelecido, onde explique o traballo realizado durante as prácticas. Contará cun titor profesional do programa, que realizará un informe de avaliación de cada estudante que realice as prácticas na súa empresa. Por outro lado, o titor académico da USC que lle corresponda avaliará, tendo en conta a memoria e o informe do titor profesional, o traballo de cada estudante.