Grao en Comunicación Audiovisual (3ª edición)

• Perfil de ingreso

  Aínda que non se esixe unha formación previa específica, o ingreso ao Grao en Comunicación Audiovisual determinarase na ponderación das materias optativas específicas da proba de acceso á universidade, predominando aquelas da modalidade de Artes e a modalidade de Humanidades e Ciencias Sociais, sen restrinxir o acceso desde outras modalidades de bacharelato.
  Calidades desexables do futuro estudante do grao de Comunicación Audiovisual:
  • Interese polos produtos audiovisuais e polos mecanismos necesarios para a súa produción e difusión.
  • Interese polas artes visuais e pola creación de obras artísticas audiovisuais.
  • Interese polos medios de comunicación e polo coñecemento da actualidade.
  • Capacidade de observación da contorna.

• Número mínimo de créditos ECTS de matrícula por estudante e período lectivo

  1.- O alumnado de primeiro curso por primeira vez a tempo completo ten que matricular 60 créditos. Un 15% do alumnado poderá cursar estudos a tempo parcial (30 créditos).
  2.- Continuación de estudos: libre cun máximo de 75 créditos.

• Acción titorial e acollida

  Na Facultade de Ciencias da Comunicación desenvólvense as seguintes liñas de acción que apoian a acollida e orientación do alumnado de novo ingreso na súa incorporación á universidade e a titulación:
  1. Sitio web do Centro.
  https://www.usc.gal/es/centro/facultad-ciencias-comunicacion
  2. Acto de benvida.
  Durante a primeira semana de cada curso académico organízase unha xornada de benvida que ten como finalidade orientar aos estudantes de novo ingreso. Participan nesta sesión os responsables do equipo decanal, coordinadores/as de titulación e dos cursos e o alumnado titor. O acto termina cunha visita guiada polo centro. Explícanse os detalles sobre o funcionamento da Facultade (aulas de informática, préstamo bibliotecario, salas de estudo) e as orientacións xerais sobre o plan de estudos: normas de permanencia, exames, consellos sobre matrícula, convocatorias etc.. A esta sesión asiste un representante do equipo reitoral que informa aos novos alumnos do funcionamento da Universidade en xeral e, sobre todo, dos seus dereitos e deberes, así como das actividades que se organizan na contorna universitaria.
  3. Apoio de alumnado titor.
  No segundo cuatrimestre de cada curso prepárase a un grupo de alumnos/as de segundo ou terceiro curso para ser alumnado titor no curso seguinte. A formación de titores, impartida por persoal cualificado, ponlles ao corrente en todo o relacionado coa USC e coa forma de canalizar aos novos estudantes. Como se dixo anteriormente, a tutorización comeza o primeiro día do curso entrante e segue durante todo o ano académico. Con este sistema, xa experimentado desde o curso 2006-2007, preténdese que o alumno teña unha relación fluída dentro da Facultade en todo o referente á información e á orientación. Por último, indicarase tamén a participación do persoal de administración e servizos no sistema de apoio e orientación aos estudantes, especialmente aqueles que teñen responsabilidades na xestión de programas de prácticas e mobilidade de estudantes, biblioteca e apoio á docencia.
  4. Plan de atención á diversidade.
  A Facultade de Ciencias da Comunicación réxese polo Protocolo de atención a persoas con discapacidade da Universidade de Santiago de Compostela, elaborado polo Servizo de Participación e Integración Universitaria (SEPIU) e dispoñible nesta ligazón:
  https://www.usc.gal/es/servicios/area/inclusion-participacion-social
  Este plan contempla os protocolos de integración para os estudantes con discapacidade visual, discapacidade auditiva, discapacidade física e persoas con enfermidades mentais.
  5. Redes sociais da Facultade (@facom_usc).

• Criterios de suspensión do título

  Cando se produza a suspensión dun título oficial, a USC garante o adecuado desenvolvemento efectivo das ensinanzas que iniciasen os seus estudantes ata a súa finalización. Para iso, o Consello de Goberno aproba os criterios relacionados, entre outros, con:
  • A admisión de matrículas de novo ingreso na titulación.
  • A supresión gradual da impartición da docencia.
  • Se o título extinguido é substituído por outro similar (modificando a natureza do título), fixa as condicións que faciliten aos/as estudantes a continuidade de estudos no novo título e as equivalencias entre as materias dun e doutro plan.

• Criterios de acceso e admisión

  As probas de acceso ás tres universidades galegas (Avaliación de Bacharelato para o acceso á Universidade (ABAU) e para persoas maiores de 25 e 45 anos) están organizadas pola Comisión Interuniversitaria de Galicia (CIUG). Para solicitar praza, o alumnado debe cumprir algúns dos seguintes requisitos de acceso establecidos no artigo 3 do RD 412/2014:
  • Ter un título de bacharelato ou equivalente e superar a proba de acceso á universidade.
  • Cumprir os requisitos esixidos para o acceso á universidade nos sistemas educativos de Estados membros da Unión Europea ou de outros Estados cos que España teña subscrito acordos internacionais nesta materia.
  • Ter superada a proba de acceso á universidade para maiores de 25 anos, para maiores de 40 anos con experiencia laboral ou profesional ou a proba para maiores de 45 anos.
  • Posuír un título de técnico superior de formación profesional, ensino de artes plásticas e deseño ou de técnico deportivo superior, ou títulos equivalentes.
  • Ter un título universitario oficial de grao, máster ou un título dos correspondentes á anterior ordenación do ensino universitario (diplomado universitario, arquitecto técnico, licenciado, arquitecto, enxeñeiro) ou títulos equivalentes.
  • Ter cursados estudos universitarios parciais estranxeiros ou españois, ou que, ó finalizar os estudos universitarios estranxeiros, non teñan obtido a súa homologación en España e queiran continuar estudos nunha universidade española. Neste suposto, será requisito indispensable que a universidade correspondente recoñeza a lo menos 30 créditos ECTS.
  • Estar en condicións de acceder á universidade segundo ordenacións educativas anteriores á Lei Orgánica 8/2013, non incluídas nos apartados anteriores.
  • De maneira xeral existen as seguintes vías de acceso á Universidade:
  • Proba de acceso á universidade (ABAU): Unha vez terminado o bacharelato, para poder acceder a un grao universitario débese superar a Avaliación de Bacharelato para o acceso á Universidade.
  https://ciug.gal/gal/abau
  • Acceso desde a Formación Profesional: Se se dispón dun título oficial de técnico superior de formación profesional, de técnico superior de artes plásticas e deseño ou de técnico deportivo superior, ou títulos, diplomas ou estudos declarados equivalentes ou homologados no sistema educativo español, pódese acceder a estudar unha titulación de grao na universidade. As solicitudes ordenaranse segundo a nota media do título de técnico superior realizado sobre un máximo de 10. Se se desexa mellorar a nota de admisión aos estudos de grao, pódese facer a proba da parte voluntaria da ABAU.
  https://www.usc.es/export9/sites/webinstitucional/gl/servizos/oiu/desca…
  • Proba de acceso para maiores de 25 anos: Poden facer esta proba as persoas que sexan maiores de 25 anos de idade no ano en que se celebre a proba e que non teñan ningunha titulación académica que dea acceso á universidade por outra vía.
  • Maiores de 45 anos: Os maiores de 45 anos de idade poden estudar titulacións oficiais de grao despois de superar unha proba de acceso adaptada.
  • Acceso maiores de 40: mediante validación da experiencia laboral.
  O acceso de maiores de 40 anos ao Grao en Comunicación Audiovisual mediante validación da experiencia profesional que se deseñou realizarase considerando os perfís profesionais idóneos e a entrevista de carácter persoal.
  Para a selección dos candidatos establecerase un Tribunal Cualificador constituído segundo a proposta do Centro. O nivel de cualificación profesional esixido ao solicitante será o correspondente ás cualificacións profesionais das familias profesionais e niveis do Catálogo Nacional de Cualificacións Profesionais (CNCP), elaborado polo Instituto Nacional das Cualificacións (INCUAL), a partir do cal se estableceu a seguinte relación de familias profesionais e niveis con acceso ao Grao en Comunicación Audiovisual:
  Relación de familias profesionais e niveis con acceso ao grao
  • Artes gráficas: Nivel 2 e 3
  • Comercio e Marketing: Nivel 2 e 3
  • Imaxe e son: Nivel 2 e 3
  • Informática e comunicacións: Nivel 2 e 3

Os principais obxectivos formativos do Grao en Comunicación Audiovisual apuntan a unha capacitación ampla e exhaustiva nas distintas rutinas profesionais relativas á preprodución, produción, postprodución e difusión da obra audiovisual, incentivando o potencial creativo e estratéxico do alumnado, así como unha capacitación no estudo, crítica e análise do feito audiovisual, xerando así perfís especializados e susceptibles de imbricarse en calquera nivel ou etapa da cadea de valor e análise da obra audiovisual.
Obxectivos formativos das mencións
Mención en Estratexia, Análise e Xestión Audiovisuais:
Os obxectivos formativos da mención apuntan a unha especialización na teoría, crítica e análises audiovisuais, así como naqueles aspectos da representación audiovisual vinculados coas políticas de comunicación, a autoría ou a perspectiva de xénero, incidindo así mesmo nos aspectos máis estratéxicos da promoción e xestión dos eventos audiovisuais.
Mención en Ideación e Creación de Contidos Audiovisuais:
Os obxectivos formativos da mención apuntan a unha especialización na ideación e creación de contidos sonoros e audiovisuais nos ámbitos da animación, a gamificación e os novos formatos multimedia, documentais e obras de non-ficción, incidindo nos seus aspectos máis creativos, expresivos, tecnolóxicos, produtivos e de dirección e posta en escena.

• Competencias

  COM.1 - Deseñar e implementar estratexias de comunicación audiovisual efectiva en distintos medios, soportes e contextos.
  COM.2 - Deseñar e implementar técnicas e tecnoloxías de tratamento e expresión visuais e sonoras aplicadas ás obras audiovisuais.
  COM.3 - Recoñecer, exercitar e contextualizar as rutinas da produción, realización, dirección, edición e postprodución audiovisuais.
  COM.4 - Aplicar diversas metodoloxías á análise, á crítica e á historiografía de calquera obra audiovisual ou multimedia.
  COM.5 - Seleccionar e utilizar as técnicas e tecnoloxías máis creativas, innovadoras e axeitadas a cada reto comunicativo.
  COM.6 - Exercitar a coordinación e xestión de equipos profesionais na cocreación de produtos audiovisuais.
  COM.7 - Aplicar os coñecementos e as habilidades adquiridas dunha forma profesional e ética no ámbito da Comunicación, tendo como referente os principios e valores democráticos e os Obxectivos de Desenvolvemento Sostible.

• Habilidades e destrezas

  HAB.1 - Transmitir de maneira idónea contidos audiovisuais destinados a públicos especializados e non especializados.
  HAB.2 - Manexar as técnicas de documentación e escritura audiovisuais.
  HAB.3 - Dominar o instrumental, as técnicas e rutinas profesionais da cadea de creación e produción audiovisuais.
  HAB.4 - Manexar os fundamentos xurídicos, económicos, políticos e as técnicas e rutinas audiovisuais aplicadas a obras de ficción e non ficción.
  HAB.5 - Analizar, mediante diversas metodoloxías, calquera produto radiofónico, cinematográfico, televisivo ou multimedia.
  HAB.6 - Manexar os fundamentos, técnicas, tecnoloxías e rutinas da animación, a gamificación e a realidade virtual.

• Coñecementos

  CON.1 - Analizar a imbricación da comunicación audiovisual no contexto das industrias culturais.
  CON.2 - Coñecer o marco político, normativo e económico no que se desenvolve a industria audiovisual.
  CON.3 - Coñecer a transformación e evolución histórica das linguaxes e medios audiovisuais.
  CON.4 - Coñecer as políticas audiovisuais europeas e a súa incidencia na cadea de valor audiovisual.
  CON.5 - Coñecer as técnicas e tecnoloxías da documentación, ideación e creación propias da linguaxe audiovisual.
  CON.6 - Coñecer as competencias profesionais de produción, distribución e exhibición das obras audiovisuais.
  CON.7 - Coñecer as distintas metodoloxías de análises de calquera produto radiofónico, cinematográfico, televisivo ou multimedia.

Mobilidade

A mobilidade dos/as estudantes está regulada a través do “Regulamento de intercambios interuniversitarios”. A través da Oficina de Relacións Exteriores xestiónanse programas de intercambio tanto nacionais (SICUE), como europeos (ERASMUS) e extracomunitarios (intercambios con países de América Latina ou países de fala inglesa):
https://www.usc.gal/gl/servizos/area/internacional

Prácticas

A Facultade organiza anualmente dúas convocatorias públicas de prácticas en empresas para os alumnos de grao, distribuíndose ao longo do curso académico en dous períodos: de novembro a marzo e de abril a agosto.
O programa de prácticas da Facultade oferta unicamente prácticas remuneradas, tanto curriculares como extracurriculares.
A listaxe de convenios vixentes na Facultade pódese consultar no espazo de Prácticas do sitio web:
https://www.usc.gal/es/centro/facultad-ciencias-comunicacion/practicas
Finalizado o proceso de selección, envíase a relación do alumnado seleccionado á Unidade de Xestión Académica, con indicación do prazo establecido para a matrícula das prácticas.
A cada estudante asígnaselle un/a titor/a académico/a, e cun/a titor/a externo/a na entidade colaboradora onde realiza as prácticas.
Terán unha duración de 300 horas ou máis e figurarán como créditos extracurriculares no Suplemento Europeo ao Título, de acordo coa seguinte equivalencia: 1 crédito = 25 horas (máximo 30 créditos).
Os créditos obtidos por esta vía non contabilizan para a obtención do título académico oficial. Polo demais, a xestión destas prácticas realízase de modo idéntico á xestión das prácticas curriculares. Así, as dúas convocatorias anuais de prácticas que realiza o centro levan a cabo conxuntamente para ambos tipos de prácticas.

• Perfil de egreso

  Dirección, guión, realización, produción e xestión audiovisual, rexistro e posprodución audiovisual, investigación, docencia e crítica audiovisual.

• Saídas profesionais

  O Grao en Comunicación Audiovisual capacita para os seguintes perfís profesionais:
  • Dirección, guionización, realización, edición: profesionais especializados nas devanditas tarefas nos distintos medios audiovisuais (cinematográfico, televisivo, videográfico, publicitario, radiofónico, de infografía e multimedia), con competencias técnicas e creativas.
  • Produción e xestión audiovisual: profesionais que deseñan, planifican e organizan recursos humanos, técnicos e orzamentarios para a produción de obras audiovisuais en diversos formatos, con competencias legais e políticas.
  • Deseño de produción e postproducción visual e sonora: profesionais expertos no deseño de todos os aspectos vinculados á toma de son e imaxe, así como ao grafismo, nas diferentes fases do proceso audiovisual, con competencias en contornas interactivo-dixitais e, en concreto, producións destinadas á súa difusión a través de Internet.
  • Análise e crítica audiovisuais: perfís académicos e profesionais especializados no estudo textual e contextual dá obra audiovisual, a nivel sociocultural, normativo, político, histórico, económico e creativo.

O Centro organiza e xestiona os Traballos de Fin de Grao (12 ECTS) do alumnado garantindo a súa calidade, recoñecemento académico e aproveitamento.
Os TFG teñen, así mesmo, un/a titor/a que asiste ao estudantado na realización do traballo e que forma parte do PDI das áreas que imparten docencia na titulación. A asignación dos titores aos estudantes, a liña temática do traballo e a avaliación farase conforme ao que establece o regulamento do TFG da USC. A defensa pública do traballo require o informe previo e preceptivo do/a titor/a e o alumnado depositará o TFG no Centro, de acordo coa normativa xeral e coa guía docente da materia. A cualificación é pública e trasládase, unha vez é definitiva, ao expediente do alumnado.