Principios de Economía

O curso ten como propósito introducir o alumno aos conceptos e ao método de análise da economía e capacitalo para aplicar o razoamento económico no estudo de problemas de asignación de recursos ao nivel dos axentes económicos individuais, dos mercados e da economía no seu conxunto. En liña con este propósito xeral, o curso persegue os seguintes obxectivos específicos. Primeiro, que o alumno adquira unha perspectiva ampla das cuestións que aborda a economía. Segundo, que coñeza os conceptos, modelos e resultados básicos que se empregan en cada unha das distintas áreas da economía. Finalmente que, mediante o emprego de modelos sinxelos, o alumno se familiarice coas ferramentas e o método de análise da economía así como coa súa aplicación á análise do comportamento do consumidor e da empresa e ao estudo do funcionamento das economías de mercado.

Definición de economía.
Conceptos básicos: escaseza, custo de oportunidade, elección racional, equilibrio, eficiencia.
Demanda e oferta.
Mercados e intervención pública.
Variables e conceptos macroeconómicos.
Determinación dá renda.
Políticas macroeconómicas.

Bibiografía básica:
Begg, D., Fischer, S. y Dornbusch, R. (2006), Economía, 8a. edición, McGraw-Hill.
Krugman, P., Wells, R. y Olney, M. (2022), Fundamentos de Economía. 5ª edición, Ed. Reverté.
Samuelson, Paul y Nordhaus, William. (2019), Economía. 19a. edición, McGraw-Hill

Bibliografía complementaria:
Graue, Ana. (2009). Fundamentos de Economía. Pearson.
Lipsey, Richard y Chrystal, Alec. (1999), Introducción a la Economía Positiva. 13a. edición, McGraw-Hill.
Mankiew, N. G. (2018), Principios de Economía. 7a. edición, Cengage Learning.
Mochón, Francisco y Castejón Rafael. (2005), Economía, Teoría y Política. 5a. edición, McGraw-Hill
Phelps, Edmund S. (1993). Economía política : un texto introductorio, Antoni Bosch, Barcelona
Tugores J. y otros (1993) Introducción a la Economía. Problemas y Cuestiones. 2ª edición. Vincens Vives.
Stiglitz, Joseph. y Walsh, Carl. (2009), Microeconomía. Barcelona, 4ª edición. Editorial. Ariel
Stiglitz, Joseph y Walsh, Carl. (2004), Macroeconomía. Barcelona, 3ª edición. Editorial. Ariel
Zabaleta,A. y Castejón, R. (2009). Introducción a la Economía. 2ª edición. Prentice-Hall.

Competencias da titulación ás que contribúe a materia:
. Posuír os coñecementos analíticos básicos para estudar economía e adquirir as habilidades de aprendizaxe necesarias para continuar estudando.
. Coñecer e comprender analiticamente a nivel básico o concepto de escaseza e a asignación de recursos, o sistema de prezos, así como o papel que xogan na economía tanto os mercados e dos gobernos en economía.
. Identificar e anticipar problemas económicos relevantes en relación coa asignación de recursos en xeral, tanto no ámbito privado coma no público.
. Saber comunicar información, ideas, problemas e propostas de solución a cuestións de índole económica tanto a un público especializado como non especializado, facendo uso tanto da linguaxe verbal e escrita coma dos medios e técnicas de representación de relacións e presentación de datos que se empregan en economía.
. Achegar racionalidade á análise e á descrición de calquera aspecto da realidade económica.
. Capacidade de análise e síntese.
. Estimulación intelectual.

Competencias específicas da materia:
. Familiaridade co método económico.
. Coñecemento dos conceptos básicos da análise económica: racionalidade, mercados e goberno.
. Aplicación da análise económica a problemas actuais.
. Capacidade de identificación dos principios fundamentais da análise económica que caracterizan aos problemas económicos reais.
. Capacidade de redución dos problemas económicos reais a representacións simplificadas (modelos) sobre a base dos conceptos básicos da análise económica.
. Manexo das ferramentas básicas para a análise de modelos formais: Uso tanto da matemática elemental coma do razoamento lóxico e a representación gráfica, na análise de problemas económicos.
. Comprender analiticamente as teorías do consumo e da produción, equilibrio competitivo, mercados non competitivos, eficiencia económica e teoría do benestar.
. Definición e medición de variables económicas como produción, emprego e inflación.

As clases de encerado en grupo grande serán clases expositivas que consistirán basicamente en leccións impartidas polo profesor, dedicadas á exposición dos contidos teóricos e á resolución de problemas ou exercicios. Estas sesións estarán destinadas a representar e explicar de xeito simplificado a realidade usando os conceptos de equilibrio de mercado e comportamento racional dos axentes económicos. Utilizando as ferramentas matemáticas e a dedución lóxica, explicarase como levar a cabo análise económica utilizando estes modelos para comprender a economía real. As clases de encerado, ademais de transmitir coñecementos, teñen como propósito mostrar ao alumno o método e a forma en que traballa un analista económico. Habilidades que o alumno terá que poñer posteriormente en práctica nas clases en grupo reducido e o tempo dedicado a traballar de xeito autónomo.

As clases de encerado en grupo reducido estarán destinadas a propoñer e resolver aplicacións da teoría, problemas, exercicios e a analizar caso e exemplos que ilustren as teorías. Esta sesións tamén servirán para facer unha revisión dos coñecementos adquiridos que permita a interacción en forma crítica e a discusión de dúbidas formuladas polos estudantes sobre os conceptos, método e técnicas de análises introducidas nas clases expositivas en grupo grande. Nestas sesións tamén se inclúen probas de avaliación se as houber.

Nas titorías dáse orientación ao alumno sobre as cuestións discutidas nas clases e sobre traballos ou exercicios que se realicen durante o curso.

A avaliación da materia terá en conta todas as actividades que se deben realizar ao longo do cuadrimestre considerando distintos aspectos da adquisición das competencias ás que contribúe a materia así como a claridade e capacidade expositiva, a creatividade e a iniciativa para a participación activa. O alumno será avaliado ao longo de todo o curso e ao termino de mesmo aplicarase un exame final.

A avaliación continua ao longo do curso levará a cabo fundamentalmente durante as clases interactivas e contemplará distintos medios e modalidades de avaliación: preguntas e exercicios, resolución de cuestionarios tipos test e de resposta curta. As probas serán tanto parciais como acumulativas podéndose contemplar probas que deberán facerse sen ningún tipo de auxilio externo e probas que se poderán facer a libro aberto. Cando a nota final da avaliación continua sexa aprobatoria poderase optar por superar a materia coa nota obtida renunciando expresamente a presentarse ao exame final. Salvo este caso, con carácter xeral a nota da avaliación continua representará o 30% e o exame final o 70% da nota do curso, tanto en primeira como en segunda convocatoria. A a nota da avaliación continua computará como cero para a ponderación da nota final do curso para os alumnos que non se presenten a ningunha das probas de avaliación continua sen que lles fora concedida dispensa de clase.

Ao alumnado ao que lle sexa concedida dispénsa de asistencia a clase, seguindo a Instrución Nº 1/2017 da Secretaría Xeral sobre dispénsaa de asistencia a clase en determinadas circunstancias, avaliaráselle cun exame final específico que supoñerá o 100% da nota do curso.

Para os casos de realización fraudulenta de exercicios ou probas será de aplicación o recollido na Normativa de avaliación do rendemento académico dos estudantes e de revisión de cualificacións.

Ademais das 50 horas de traballo presencial, o alumno deberá dedicar 100 horas de traballo persoal, que inclúe o estudo autónomo (individual ou en grupo), lecturas, realización de exercicios e traballos, a análise de casos, e a preparación de presentacións orais.

Recomendacións previas: álxebra e cálculo a nivel de Bacharelato. Destreza no razoamento dedutivo e indutivo.

As guías docentes detalladas do curso, as guías docentes para cada tema, os boletíns de exercicios e o resto do material de apoio proporcionaranse a través da aula virtual do curso.

Na nota final do curso só consideraranse como "non presentados" aqueles alumnos que non se presenten a ningunha das actividades académicas avaliables conforme ao establecido na guía docente. O "non presentado" e todo o relativo ao esgotamento de convocatorias se rexe polo establecido no DOG Número 136 do 17 de xullo de 2012.