O dereito a gozarmos da ciencia en galego
-
Por cuarto ano a USC vaise unir o 4 de novembro ao Día da Ciencia en Galego, que neste ano 2015 celebra o Ano Internacional da Luz e o Ano Internacional dos Solos, escolleuse como persoeiros a quen lles dedicar as celebracións a nivel galego, os científicos galegos Carlos Gómez-Reino Carnota, profesor da Facultade de Física, e Isidro Parga Pondal, que é universalmente considerado como símbolo do científico galego.
Este conxunto de iniciativas segue o camiño comezado en 2010 coa campaña en tres fases de En galego tamén se fai ciencia (organizada polas tres universidades galegas) e continuado os pasados 2011 , 2012 , 2013 e 2014 cun programa de actividades que se estendeu por centros dos campus de Santiago e Lugo, así como coa colaboración coa Coordinadora de Equipos de Dinamización Lingüística dos centros de ensino non universitario.
Actividades
Biblioteca da USC, 4 de novembro
Centro de interese sobre os dous persoeiros a que se lles dedica o Día da Ciencia en Galego. "Isidro Parga Pondal e Carlos Gómez-Reino Carnota na bUSC" recolle unha escolma da bibliografía en pdf que se pode atopar sobre o ilustre xeólogo e o profesor de Física na nosa biblioteca.
Lugo, 4 de novembro
Parque "Rosalía de Castro", 16:30 h
Ruta xeolóxica "A historia que contan as pedras que pisas": un paseo polo centro de Lugo para descubrir todo o que se pode aprender sobre o noso pasado fixándonos nas pedras que nos rodean polo chan, nas paredes, na Muralla... Rematará arredor das 19 h. A asistencia é libre.
Casa do Saber, 19:30 h
Haberá dúas conferencias arredor da figura de Parga Pondal, como cidadán e como científico, a cargo de Verónica Martínez Delgado, profesora e investigadora, que falará sobre a súa faceta cívica en "Isidro Parga Pondal e a súa comunidade" e Francisco J. Leonardo Docanto, que comentará o seu labor científico en "Isidro Parga Pondal, doutor en Ciencias". Entrada libre.Santiago de Compostela, 7 de novembro
Museo de Historia Natural
“Parga Pondal no Museo de Historia Natural, o pai da xeoloxía en Galicia”. Obradoiros gratuítos con inscrición previa:
- Nenos/as de 6 a 12 anos en horario de mañá (11-13 h), que visitarán o Museo a través das coleccións nas que Parga traballou e realizarán actividades a seu redor coas que poderán comezar a súa “Colección de pedras de Galicia” como fixo Parga no seu tempo e coñecer un pouco máis da nosa xeoloxía.
- Adultos, en horario de tarde (17-19 h). Nel tamén se fará unha visita ao Museo a través das coleccións nas que Parga traballou e darase a coñecer a súa vida, a súa obra científica e a súa vinculación a Universidade e ao Museo.
Lugo, 7 de novembro
Biblioteca Intercentros, 10:30 a 19 h
Segundo wikimaratón do Día da Ciencia en Galego
Por segunda vez, a Galipedia, Proxéctate en Galego e a Biblioteca Intercentros organizan este evento que busca ampliar ou mellorar a información científica recollida na versión galega da Wikipedia, e nomeadamente a relacionada coas temáticas e os persoeiros homenaxeados no Día da Ciencia en Galego.