Ampliado ata o 31 de marzo o prazo para pedir as bolsas ‘Retorna ao Rural’ dirixidas a estudantado de Ciencias, ADE e Humanidades

O programa ‘Retorna ao Rural con Campus Terra’ dá pulo á realización de prácticas en empresas ou entidades situadas no rural de Galicia. O estudantado das facultades de Ciencias, Administración e Dirección de Empresas e Humanidades aínda pode concorrer a esta convocatoria cuxo prazo acaba de ser ampliado ata o luns, 31 de marzo. 

Dirixidas a estudantado vinculado ao Campus Terra da USC, as bolsas, financiadas polo convenio de colaboración entre a Universidade de Santiago de Compostela e a Consellaría de Educación, Ciencia, Formación Profesional e Universidades da Xunta de Galicia, diríxense a estudantado de grao (último ano) ou mestrado. Coa intención de promover o retorno a territorios rurais e apoiar as empresas asentadas nel, o programa oferta prácticas cunha duración dun mes que poderán realizarse entre abril e xullo de 2025.