Unha delegación de 11 universidades de Kazaxistán, Taxiquistán, Usbequistán e Turkmenistán visitou estes días a Facultade de Ciencias Económicas e Empresariais da USC no marco do proxecto europeo CirculEC, cuxo obxectivo é capacitar esas institucións educativas de Asia Central para mellorar a formación en economía circular e sustentabilidade. 

Financiado polo programa Erasmus CBHE da Comisión Europea e executado polos grupos de investigación ICEDE e POSMARK na USC, o proxecto contemplou en Santiago unha xornada de foemación sobre Economía Circular e Sustentabilidade e os diferentes aspectos desta temática e outra de visita ao Centro Tecnolóxico do Auga, CETAQUA – VIAQUA, onde as recibiu Teresa Alvariño, directora do Centro. Igualmente, contaron coa presenza de Ana Botas, xerente de VIRATEC, Clúster Galego Solucións Ambientais e Economía Circular, con quen se estableceu un produtivo debate sobre potenciais formas de cooperación para a aprendizaxe mutua.