A labarada científica prende no centenar de estudantes que integran a duodécima edición do Campus de Verán XuvenCiencia
A duodécima edición do Campus de Verán XuvenCiencia da USC botou a andar este luns 1 coa participación de 95 mozos e mozas preuniversitarias que ao longo desta semana poderán profundar, en primeira persoa, na investigación que a USC desenvolve no seu Campus de Lugo. Obradoiros, visitas a centros de investigación, así como múltiples actividades de lecer integran o diverso programa desta iniciativa na que se involucra o conxunto de facultades e escolas do Campus Terra. A sesión inaugural que tivo lugar no Auditorio da Facultade de Veterinaria, contou coa participación do vicerreitor de Organización Académica e Campus de Lugo, Francisco Fraga López; a coordinadora de XuvenCiencia e profesora da USC, Mercedes Novo; e a CEO do Grupo Aresa, Carlota López.
O alumnado elixe entre proxectos de tipo biosanitario, científico experimental, ou de ciencias sociais e humanidades, nos que se achegarán ao día a día da investigación académica que se realiza na Universidade de Santiago de Compostela. Entre as novidades desta edición, destaca o proxecto ‘Enfermaría, farmacia e medicina: traballando pola nosa saúde’ no que se desenvolverán actividades que mostren o coidado da saúde nas persoas. Toma de constantes vitais, realización de probas diagnósticas, manexo de materiais cirúrxicos para a realización de curas, administración de medicación subcutánea e control de sueroterapia, con contido teórico e práctico mediante simulación clínica, serán algúns dos contidos a desenvolver no marco deste proxecto para coñecer a situación clínica das persoas e a actuación en determinadas situacións onde hai alteración do estado da saúde. Esta actividade terá lugar no Hospital Universitario Lucus Augusti e na Escola Universitaria de Enfermaría.
A actividade ‘XuvenFeira: Tecnoloxías do futuro na EPSE. Heroínas con súperpoderes e Industria 5.0: Como o imperio construíu a Estrela da Morte’ permitirá coñecer, no Laboratorio de PEMADE, as vantaxes do emprego da madeira na construción das cidades e as múltiples posibilidades neste ámbito. Pola súa parte, o Laboratorio de Parasitoloxía acollerá o obradoiro ‘As carrachas, presuntas culpables’, no que se afondará nas carrachas que se poden atopar en Galicia e nas enfermidades que transmiten a través do desenvolvemento dun caso clínico.
Interactuar cos coidadores robóticos que nos acompañarán no futuro, así como aprender a combater os insectos pragas dun xeito respectuoso co medio ambiente, producindo e liberando inimigos naturais, será a meta da actividade ‘XuvenFeira: Tecnoloxías do futuro na EPSE. Aliens & Predators contra as pragas dos cultivos e Coidadores robóticos’, outra das novidades que ofrece XuvenCiencia no seu programa de actividades que se atopa integrado por un amplo abano de actividades e de proxectos. O alumnado estará acompañado por Monitorado Científico da USC e pola tarde-noite con monitores titulados pertencentes á ADC Lumieira.
