O programa impartido polos profesores Pablo César Carril e Mª Isabel Dans del Valle, e incluído no programa de formación do Campus Terra da USC, desenvólvese desde este luns ata o venres 29 na EPS de Enxeñaría
Os profesores da USC Pablo César Muñoz Carril e Mª Isabel Dans del Valle imparten desde hoxe e ata o venres 29 de setembro un módulo formativo sobre utilización das TIC nos procesos de avaliación e control de plaxio. As sesións formativas deste curso, que está incluído no plan de formación do Campus Terra 2023, celébranse en quenda de tarde, de 16.00 a 18.00 horas, na Sala de Xuntas da EPS de Enxeñaría, e terán continuidade a través da plataforma en liña MsTeams no campus virtual da USC.
O obxectivo desta proposta formativa é o de brindar aos docentes ferramentas que axilicen os procesos de cualificación para que poidan enfocarse no ensino. Garantir que os estudantes están a producir traballos orixinais e combater as faltas máis sofisticadas á integridade académica é outro dos cometidos dun curso para o que aínda permanece aberta a inscrición en liña.