Grao en Robótica

• Perfil de ingreso

  Aínda que non se esixe unha formación previa específica, é recomendábel que o estudante teña cursado durante o bacharelato a modalidade de Ciencias e Tecnoloxía (R.D. 1467/2007).

  - Curiosidade intelectual
  - Hábito de leitura
  - Capacidade analítica
  - Capacidade crítica
  - Capacidade de aplicar fundamentos para a resolución de problemas
  - Constancia e responsabilidade no traballo
  - Capacidade para o traballo en equipo
  - Capacidade para usar o tempo de forma efectiva
  - Competencia en expresión oral e escrita
  - Competencia lingüística en inglés, ademais de en galego e en castelán
  - Competencia en ferramentas informáticas básicas

• Número mínimo de créditos ECTS de matrícula por estudante e período lectivo

  1.- O alumnado de primeiro curso por primeira vez a tempo completo ten que matricular 60 créditos. Un 15% do alumnado poderá cursar estudos a tempo parcial (30 créditos).
  2.- Continuación de estudos : libre cun máximo de 75 créditos.

• Acción titorial e acollida

  A Escola Politécnica Superior de Enxeñaría desenvolve, en solitario ou conxuntamente con outros centros, as seguintes accións de apoio e orientación para os estudantes matriculados no grado:

  - Programa de alumnos titores: A figura do alumno titor é a dun estudante "veterano", que, fundamentalmente, orienta e apoia os novos estudantes que se incorporan ao centro, estando a disposición destes para facilitarlles a orientación e a súa mellor integración no ámbito universitario. A USC realiza unha convocatoria anual para este programa . Información sobre este programa:

  Programa alumnos titores

  - Presentación da Biblioteca Intercentros e formación de usuarios: a Biblioteca Intercentros do Campus de Lugo , como no resto dos centros da Biblioteca Universitaria da USC, oferece á comunidade universitaria un plan de formación dirixido a profundar no coñecemento dos servizos bibliotecarios e dos recursos de información. Ao longo do curso académico, esta biblioteca realiza sesións de presentación dirixidas a alumnos de novo ingreso e organiza cursos adaptados aos diferentes tipos de usuarios e ás diferentes áreas temáticas que se imparten na Universidade. Así, realízanse cursos de manexo do catálogo, instrumentos básicos de consulta, bases de datos, revistas e libros electrónicos, recursos accesibles a través de Internet, etc.

  - Atención continuada no centro: a dirección do centro e a súa unidade de apoio á xestión están accesíbeis a cotío para calquera consulta de ámbito académico que afecte os estudos da escola. Ademais, a páxina Web do centro mantense permanentemente actualizada como referencia básica de información, na cal se poden consultar horarios de actividades académicas, calendarios de avaliación, programas de materias, horas de titoría do profesorado, actividades extraordinarias, normativa, etc.

• Criterios de suspensión do título

  Cando se produza a suspensión dun título oficial, a USC garante o adecuado desenvolvemento efectivo das ensinanzas que iniciasen os seus estudantes ata a súa finalización. Para iso, o Consello de Goberno aproba os criterios relacionados, entre outros, con:

  • A admisión de matrículas de novo ingreso na titulación.
  • A supresión gradual da impartición da docencia.
  • Se o título extinguido é substituído por outro similar (modificando a natureza do título), fixa as condicións que faciliten aos/as estudantes a continuidade de estudos no novo título e as equivalencias entre as materias dun e doutro plan.

• Criterios de acceso e admisión

  Poden acceder a estudos de Grao aqueles estudantes que posúan os títulos, diplomas ou estudos seguintes ou otros declarados equivalentes ou homologados a estes:
  A.1. Bacharelato do Sistema Educativo Español, Bacharelato Europeo o Bacharelato Internacional.
  A.2. Bacharelato procedente de sistemas educativos de Estados membros da Unión Europea ou de otros Estados cos que se teñan subscrito acordos internacionais.
  A.3. Técnico Superior de Formación Profesional, Técnico Superior de Artes Plásticas e Diseño ou Técnico Deportivo Superior pertencente ao Sistema Educativo Español.
  A.4. Outros estudos que, nun Estado membro da Unión Europea ou noutros Estados cos que se teñan subscrito acordos internacionais en réxime de reciprocidade, acrediten os requisitos académicos esixidos en ditos Estados para acceder aos seus estudos universitarios.
  A.5. Títulos universitarios oficiais de Diplomado, Arquitecto Técnico, Enxeñeiro Técnico, Licenciado, Arquitecto, Enxeñeiro, Graduado ou Máster Universitario.
  A.6. Estudos universitarios parciais, estranxeiros ou españois.
  Tamén poderán acceder a estudios de Grao:
  B.1. Persoas maiores de vintecinco anos que superen unha proba de acceso específica.
  B.2. Persoas maiores de corenta anos con experiencia laboral ou profesional en relación cunha ensinanza universitaria.
  B.3. Persoas maiores de corenta e cinco anos que superen unha proba de acceso específica.
  Do mesmo xeito, poderán acceder a estudos de Grao:
  C.1. Persoas que estiveran en condicións de acceder á universidade segundo ordenacións do Sistema Educativo Español anteriores á Lei Orgánica 8/2013, de 9 de decembro.

A Escola Politécnica Superior de Enxeñaría (USC) conta con 18 aulas de uso xeral, 6 salas de seminario e 6 aulas de informática para docencia. Dispón de 18 laboratorios, 8 naves taller e 2 aulas de expresión gráfica. Destacar a dispoñibilidade dos Laboratorios de Robótica I e de Robótica II, Laboratorios de Física I e de Física II, do Laboratorio de Mecanización, Sensorización e Visión artificial, do Laboratorio de Electrotécnia e Automatización, e así como do Laboratorio de Instrumentación.

Destacar o esforzo realizado para, ademais do equipamento xa existente na USC e na EPS de Enxeñaría para a docencia especializada, dotar a este grao de todo a infraestrutura necesaria unha docencia de calidade: un amplo abanico de plataformas robotizadas e completamente sensorizadas para o seu control autónomo, entre as que se poden mencionar robots móbiles adaptados para a realización de prácticas en interiores, así como outros robots móbiles preparados para moverse en exteriores, en terreos moi irregulares, e con capacidade de carga, brazos articulados, robots aéreos, robots de servizos e bípedos humanoides, paneis de automatización industrial, postos dotados con sistema mecatrónico, banco de transmisións, equipos de sensores e mecanismos, cámaras, kits de enxeñaría e robótica para ensamblaxe de robots, etc.

Entre os espazos habilitados para o alumnado, cóntase tamén cunha aula de informática de acceso libre, existindo conexión sen fíos dende calquera punto do centro.

O servizo de Biblioteca do Campus universitario de Lugo atópase centralizado nun único edificio denominado Biblioteca Intercentros situado ao lado do centro onde os alumnos dispoñen de máis de 1600 postos de consulta repartidos en 9 salas, incluíndo unha sala de traballo en grupo.

O obxectivo do Grao en Robótica é proporcionar unha formación sólida ao alumnado, que o capacite para traballar en ámbitos altamente especializados, relacionados coa robótica mediante unha formación eminentemente aplicada e impartida por profesorado especializado.

• Competencias básicas

  - Que os estudantes demostren posuír e comprender coñecementos nunha área de estudo que parte da base da educación secundaria xeral, e adóitase atopar a un nivel que, aínda que se apoia en libros de texto avanzados, inclúe tamén algúns aspectos que implican coñecementos procedentes da vangarda do seu campo de estudo.
  - Que os estudantes saiban aplicar os seus coñecementos ao seu traballo ou vocación dunha forma profesional e posúan as competencias que adoitan demostrarse por medio da elaboración e defensa de argumentos e a resolución de problemas dentro da súa área de estudo.
  - Que os estudantes teñan a capacidade de reunir e interpretar datos relevantes (normalmente dentro da súa área de estudo) para emitiren xuízos que inclúan unha reflexión sobre temas relevantes de índole social, científica ou ética.
  - Que os estudantes poidan transmitir información, ideas, problemas e solucións a un público tanto especializado como non especializado.
  - Que os estudantes desenvolvan aquelas habilidades de aprendizaxe necesarias para emprenderen estudos posteriores cun alto grao de autonomía.

• Competencias xerais

  - Coñecemento de materias básicas e tecnoloxías, que o capacite para a aprendizaxe de novos métodos e tecnoloxías, así como que o dote dunha grande versatilidade para adaptarse a novas situacións.
  - Capacidade de resolución de problemas no campo da enxeñaría robótica con creatividade, iniciativa, metodoloxía e razoamento crítico.
  - Capacidade de utilizar ferramentas informáticas para o modelado, a simulación e o deseño de aplicacións de enxeñaría.
  - Saber as necesidades tecnolóxicas da sociedade e a industria, e ser capaz de mellorar servizos e procesos de produción aplicando tecnoloxía actual de robótica, mediante a elección, adquisición e posta en marcha de sistemas robóticos en diferentes aplicacións, tanto industriais como de servizos.
  - Ser capaz de obter e analizar información sobre circuítos, elementos de máquinas, control automático, sensores e sistemas informáticos, co fin último de lograr aplicacións robóticas autónomas e flexíbeis
  - Concibir, calcular, deseñar e poñer en marcha algoritmos, equipos ou instalacións no ámbito da robótica, para aplicacións industriais ou de servizos, tendo en conta aspectos de calidade, seguridade, criterios medioambientais, uso racional e eficiente de recursos.
  - Capacidade de traballar nun grupo multidisciplinar e de comunicar, tanto por escrito como de forma oral, coñecementos, procedementos, resultados e ideas relacionadas coa robótica e coa electrónica.

• Competencias específicas

  - Capacidade de entender, e aplicar a diversos problemas de enxeñaría robótica, os fundamentos matemáticos acerca de: álxebra lineal, xeometría, cálculo diferencial e integral, ecuacións diferenciais, funcións de variábel complexa, métodos numéricos, cálculo de probabilidades e estatística.
  - Entender e saber aplicar en problemas de enxeñaría os fundamentos físicos en que se basea a enxeñaría da robótica: estática, cinemática, dinámica, electromagnetismo e circuítos eléctricos e electrónicos.
  - Coñecemento dos fundamentos e aplicacións da electrónica dixital e microprocesadores.
  - Coñecer, saber utilizar e integrar os sistemas operativos e sistemas encaixados, así como as súas características de multitarefa ou comunicación entre aplicacións.
  - Capacidade de analizar, deseñar, representar e programar algoritmos, e manexo das estruturas de datos adecuadas para a resolución de problemas no ámbito da robótica.
  - Coñecer fundamentos de electrotecnia e entender o funcionamento das máquinas eléctricas, especialmente motores de CA/CC, e coñecer cales son as fontes de enerxía máis adecuadas para robots fixos ou autónomos.
  - Adquirir a capacidade e as técnicas de representación gráfica para o deseño e interpretación de planos e esquemas.
  - Coñecer os distintos tipos de control para deseñar, analizar e programar sistemas robóticos.
  - Coñecer os sensores habituais en robótica, o seu funcionamento, así como os métodos e técnicas para o tratamento da información captada.
  - Analizar e entender a configuración dun sistema de control automático para proceder á súa modificación ou actualización mediante as técnicas que permitan deseñar, configurar e axustar controladores.
  - Coñecemento das funcións e programación de distintos autómatas no campo da robótica.
  - Capacidade de coñecer e implementar métodos de extracción de características a partir da información percibida por cámaras e sensores 3D ao desenvolvemento de aplicacións en robots e sistemas intelixentes.

• Competencias transversais

  - Capacidade de análise e síntese.
  - Capacidade para o razoamento e a argumentación.
  - Capacidade de traballo individual, con actitude autocrítica.
  - Capacidade para traballar en grupo e abarcar situacións problemáticas de forma colectiva
  - Capacidade para obter información adecuada, diversa e actualizada.
  - Capacidade para elaborar e presentar un texto organizado e comprensíbel.
  - Capacidade para realizar unha exposición en público de forma clara, concisa e coherente.
  - Compromiso de veracidad da información que ofrece aos demais.
  - Habilidade no manexo de tecnoloxías da información e da comunicación (TIC).
  - Utilización de información bibliográfica e de Internet.
  - Utilización de información complementaria e/ou puntual en lingua inglesa
  - Capacidade para resolver problemas mediante a aplicación integrada dos seus coñecementos

Mobilidade

As accións de mobilidade dos/as estudantes pretenden mellorar a calidade da educación superior e reforzar a súa dimensión, tanto nacional como internacional, fomentando a cooperación entre as universidades, potenciando os intercambios e mellorando a transparencia e o recoñecemento académico de diferentes estudos e cualificacións. Neste sentido, considéranse unha peza importante para a consecución dos obxectivos propostos no título, tanto no que se refire ás competencias xerais dos futuros egresados como ás competencias transversais a adquirir coa titulación.

A EPS de Enxeñaría conta coa colaboración de varios profesores/as que actúan como coordinadores académicos, e cuxa función é tutorar e asistir nas súas decisións académicas os estudantes propios e de acollida.

Realízase a partir do segundo ano de estudos da titulación, en períodos semestrais ou anuais. A selección dos candidatos lévase a cabo, para cada convocatoria ou programa, por unha comisión de selección, de acordo con criterios de baremación previamente establecidos que teñen en conta o expediente académico, unha memoria e, de ser o caso, as competencias en idiomas que esixe a universidade de destino.

A mobilidade dos/as estudantes está regulada a través do “Regulamento de intercambios interuniversitarios”. A través da Oficina de Relacións Exteriores xestiónanse programas de intercambio tanto nacionais (SICUE), como europeos (ERASMUS) e extracomunitarios (intercambios con países de América Latina ou países de fala inglesa):

Portal Internacional

Prácticas

Nesta titulación as prácticas externas contémplanse como obrigatorias cunha carga de 12 ECTS. Consistirán na realización de prácticas nunha empresa ou organismo durante 30 h máis a elaboración do informe correspondente.

A oferta de prácticas no Grao sustentarase no actual programa de prácticas externas que xestiona a Escola Politécnica Superior de Enxeñaría. A EPS conta con preto de 400 convenios con empresas e institucións para que o alumnado das distintas titulaciones que se imparten nela poida realizar prácticas externas.

As prácticas realizaranse a tempo completo preferibelmente nun período non lectivo de aproximadamente oito semanas de duración planificado para o segundo semestre do cuarto curso aínda que o alumnado poderá realizalas ao longo do curso académico. Cando as características do traballo así o requiran, poderanse establecer períodos e xornadas diferentes de realización (tempo parcial, días alternos, etc.), garantindo en todo caso as 300 horas de dedicación dos estudantes.

A organización, xestión e seguimiento das prácticas externas correrá a cargo da subdirección de prácticas e orientación laboral do centro, sempre de acordo con normativa da USC e a normativa propia da EPS, que se encargará da asignación dos centros de prácticas e do seu seguimento. Ademais, proporá á Comisión do Título a asignación ao alumno dun titor académico entre o persoal docente e investigador do centro, que fará un seguimiento do traballo realizado e velará pola calidade da estancia realizada, e un titor externo na empresa, encargado de garantir as condicións apropiadas para a realización da práctica.

As ensinanzas conclúen coa elaboración e defensa dun Traballo Fin de Grao de 12 ECTS. O Traballo Fin de Grao poderá presentarse e defenderse cando o alumno/a teña superados todos os demais créditos necesarios para a obtención do título, é dicir, 228 ECTS

O obxectivo do TFG será verificar a adquisición por parte do estudante das destrezas e competencias descritas con anterioridade nos obxectivos xerais do título de grao, xunto a destrezas específicas de orientación académica ou profesional. Consistirá nun proxecto, estudo técnico, traballo de investigación aplicada ou outra actuación que poida ser considerada como traballo facultativo ou profesional dentro do ámbito das robótica.