A Casa das Máquinas acolle o 11 de novembro, ás 19.00 horas, o espectáculo ‘A baralla cuántica: percepción, información e realidade’. O investigador do IGFAE Javier Mas e o mago Kiko Pastur únense, coa axuda do ilusionismo, para representar a perplexidade e confusión que supuxo o desenvolvemento das teorías da mecánica cuántica sobre a nosa percepción e coñecemento. A entrada é libre ata completar a capacidade do espazo.
A actividade enmárcase na Semana da Ciencia do IGFAE, que na súa oitava edición céntrase na conmemoración, neste 2025, no Ano Internacional da Ciencia e a Tecnoloxía Cuánticas. Con esta efeméride conmemórase o centenario da publicación dalgúns dos artigos máis relevantes para a construción da mecánica cuántica, a teoría que describe as propiedades dos elementos fundamentais da materia, da man de autores como Einstein, Planck, Böhr, Schrödinger, Heisenberg, De Broglie, Born ou Dirac.
